Omanda ABŞ və İran arasında dolayı danışıqların üçüncü raundu başa çatıb.
Oxu.Az xəbər verir ki, bu barədə İranın dövlət teleradio şirkəti məlumat yayıb.
Məlumata görə, İran və ABŞ-dən olan ekspertlərdən ibarət nümayəndə heyətləri gələcək razılaşma ilə bağlı hər iki tərəfin gözləntiləri və tələblərinə dair bəzi detalları dəqiqləşdirə biliblər.
Qeyd olunur ki, hər iki danışıq qrupu hakimiyyətdən əlavə göstərişlər almaq üçün ölkələrinə qayıtmağa məcbur olduğundan dialoqun hazırkı mərhələsi başa çatıb.
ABŞ-İran danışıqlarının üçüncü raundu başlayıb.
Oxu.Az-ın xəbərinə görə, bu barədə İranın "Tasnim" agentliyi məlumat verib.
Məlumata görə, İranın nüvə proqramı ətrafında yaranmış böhranın həlli üçün ABŞ-İran danışıqlarının üçüncü mərhələsi Omanın vasitəçiliyi ilə Maskat şəhərində baş tutub.
Siyasi danışıqlarda İran nümayəndə heyətinə xarici işlər naziri Abbas Əraqçı rəhbərlik edəcək, ABŞ tərəfini isə prezidentin xüsusi nümayəndəsi Stiven Uitkoff təmsil edir.
Daha əvvəl bildirildiyinə görə, danışıqlar zamanı iki ölkənin nümayəndə heyətləri İranın nüvə proqramı ilə bağlı potensial razılaşmanın detallarının müzakirə ediləcəyi gözlənilir.
Qeyd edək ki, danışıqların əvvəlki iki raundu da Oman vasitəçiliyi ilə keçirilib və tərəflərin mövqelərinin yaxınlaşdırılması istiqamətində müəyyən irəliləyişlər göstərib.
