ABŞ-nin ən böyük banklarından biri olan "Citibank" Birləşmiş Ərəb Əmirliklərindəki (BƏƏ) filiallarını müvəqqəti olaraq bağlayır.
Oxu.Az-ın Aawsat.com nəşrinə istinadən xəbərinə görə, bu barədə bankın saytında məlumat verilib.
Məlumata görə, "Citibank" Yaxın Şərqdə dərinləşən böhran fonunda ehtiyat tədbiri olaraq BƏƏ-dəki filiallarını və maliyyə mərkəzlərini 14 mart tarixinə qədər bağlayacaq.
ABŞ bankı təsir altında qalan bütün filiallarını martın 16-da yenidən açmağı planlaşdırır, lakin Dubayın mərkəzindəki "Mall of the Emirates" ticarət mərkəzindəki filialı bu müddət ərzində açıq qalacaq.
Bu həftənin əvvəlində isə "Citibank" göstəriş vermişdi ki, əməkdaşlar Dubay Beynəlxalq Maliyyə Mərkəzindəki (DIFC) və Dubayın Ud-Metha rayonundakı ofislərdən təxliyə olunsunlar və növbəti xəbərdarlığa qədər evdən işləsinlər.
Xatırladaq ki, fevralın 28-də İsrailin müdafiə naziri İsrael Kats İsrail Müdafiə Qüvvələrinin İrana qabaqlayıcı zərbə endirdiyini açıqlayıb. Daha sonra ABŞ Prezidenti Donald Tramp ölkəsinin də İrana qarşı hərbi əməliyyatda iştirak etdiyini bildirib.
İran isə öz növbəsində İsrailə onlarla ballistik raket atıb. İsrail Müdafiə Qüvvələri atışları təsdiqləyib, ölkə daxilində sirenlər səslənib və hava hücumundan müdafiə sistemləri işə salınıb.
Martın 1-də İranın Ali Lideri Əli Xameneinin hücumlar zamanı öldürüldüyü bəyan olunub.
İran ABŞ-nin hərbi bazalarının yerləşdiyi qonşu ölkələrin əksəriyyətinə raket zərbələri endirib. Buna görə də həmin ölkələrdə hava məkanı müvəqqəti bağlanıb.
