"Artemis II" missiyası çərçivəsində Aya doğru yola düşən ABŞ-nin "Orion" kosmik aparatı Uçuşlara Nəzarət Mərkəzi ilə rabitəni itirib və tullantıların idarəolunması sistemini işə salarkən nasazlıqlarla üzləşib.
Oxu.Az xəbər verir ki, bu barədə ABŞ-nin Milli Aeronavtika və Kosmik Tədqiqatlar İdarəsinin (NASA) rəhbəri Cared Ayzekman raketin buraxılışından sonra təşkil olunan mətbuat konfransında açıqlama verib.
Onun sözlərinə əsasən, aparatla kommunikasiya qısa müddətə dayanıb. Mərkəz mütəxəssisləri kosmonavtların səsini eşitməsələr də, astronavtlar Yerdən göndərilən siqnalları qəbul etməyə davam ediblər.
Ayzekman bu nasazlığın siqnalın bir ötürücü stansiyadan digərinə keçidi zamanı yarana biləcəyini ehtimal edib.
NASA-nın "Artemis II" missiyası ötən gecə Aya doğru hərəkətə başlayıb. Bu, əlli ildən artıq bir fasilədən sonra baş tutan ilk belə uçuşdur. Proqramın əsas hədəfi növbəti mərhələ hesab edilən və Ayın səthinə enişi nəzərdə tutan "Artemis III" missiyası üçün hazırlıq işləri görməkdir.
Aya uçuşun startı ilkin olaraq mart ayı üçün nəzərdə tutulsa da, bu ilin əvvəlində yaranan texniki problemlər səbəbindən təxirə salındığı açıqlanmışdı. Gələcək Ay missiyalarının proqramı da ertələnib: misal üçün, 2027-ci ilə planlaşdırılan Aya eniş başqa bir tədqiqat uçuşu ilə əvəzlənərək 2028-ci ilə qədər gecikdirilib.
