Böyük Britaniyada Oksford Universitetinin Vuster kollecində onilliklər boyu rəsmi tədbirlərdə insan kəlləsindən hazırlanmış qədəhdən istifadə edilib. Bunu "Hər bir abidə dağılacaq" adlı yeni kitabında universitetin Pitt Rivers Muzeyinin kuratoru professor Den Hiks yazıb.
Oxu.Az "The Guardian"a istinadən xəbər verir ki, tarixçinin sözlərinə görə, qədəh kəsilmiş və cilalanmış kəllə sümüyündən hazırlanıb, gümüş detallarla bəzədilib. Bu qab 2015-ci ilə qədər Vuster kollecində rəsmi ziyafətlərdə şərab və şokolad təqdim etmək üçün istifadə olunub.
Karbon analizi göstərib ki, kəllə təxminən 225 yaşındadır. Dolayı məlumatlara görə, o Karib adalarından olan qul qadına məxsus ola bilər, lakin onun şəxsiyyəti naməlumdur.
Qədəhi 1946-cı ildə kollecə faşizm tərəfdarı olan, İkinci Dünya müharibəsi zamanı həbs olunmuş Corc Pitt-Rivers hədiyyə edib.
