"Birləşmiş Krallığın sabiq hökumət rəhbəri Kir Starmerin vəzifədən getməsi qaçılmaz addım idi: o, həm partiya üzvlərinin, həm də əhalinin böyük qisminin etimadını itirdiyi üçün fəaliyyətini davam etdirə bilməyib. Baş nazir postunda onu əvəz edən Endi Börnhemin əsas məqsədi mövcud iqtisadi böhran fonunda ölkədəki vəziyyəti stabilləşdirmək üçün müvafiq addımlar atmaq olacaq".
Oxu.Az xəbər verir ki, bu barədə Böyük Britaniya parlamentinin sabiq deputatı Metyu Qordon Benks REN TV kanalına açıqlamasında bildirib.
Analitikin sözlərinə görə, Börnhem həm ölkə, həm də ümumilikdə Avropa iqtisadiyyatı üçün olduqca mürəkkəb bir mərhələdə hökumətə rəhbərlik edəcək. Dövlət xərclərinin çoxluğu və böyükhəcmli dövlət borcunun ödənilməsi zərurəti Krallığın inkişafı qarşısında duran əsas əngəllərdir və bu amillər iqtisadi inkişafı tormozlayır.
"Yeni kabinetin qarşısında duran başlıca hədəflərdən biri sadəcə büdcə vəsaitlərini xərcləməklə kifayətlənməyib, xərc istiqamətlərinin prioritetlərini yenidən nəzərdən keçirərək iqtisadi yüksəlişə nail olmağa çalışmaqdır", - deyə Benks vurğulayıb.
Eyni zamanda, Londonun İsrail, Ukrayna və Yaxın Şərqlə bağlı xarici siyasət kursu davamlı olaraq qalacaq - yeni Nazirlər Kabineti ona ciddi düzəlişlər etməyi planlaşdırmır.
Bildirilir ki, Börnhemin komandasının dövlət xərclərini azaltmaq və Ukrayna məsələsinin prioritetliyini aşağı salmaq istəyinə baxmayaraq, Böyük Britaniyanın daimi məmur aparatı Starmerin kursunu qoruyub saxlamaq məqsədilə təzyiq göstərəcək.
