Konqo Demokratik Respublikasında (KDR) və Uqandada davam edən Ebola qızdırması alovlanmasının, çox güman ki, virusun heyvandan insana yeni keçidi nəticəsində başladığı bildirilir.
Oxu.Az bu barədə "Reuters" agentliyinə istinadən xəbər verir.
Tədqiqatçılar KDR, Uqanda, Belçika və digər ölkələrdən olan həmkarları ilə birlikdə Konqo və Uqandada 22 xəstədən götürülmüş virus nümunələrinin genetik tərkibini təhlil ediblər. Məlum olub ki, hazırkı epidemiyaya səbəb olan virus ştammı 2007 və 2012-ci illərdə Bundibucyo bölgəsində qeydə alınmış Ebola viruslarından genetik cəhətdən fərqlənir.
Tədqiqatın nəticələri göstərir ki, alovlanma virusun heyvandan insana yeni keçidi ilə başlayıb, daha sonra isə insanlar arasında yayılıb. Qeyd olunur ki, araşdırma zamanı alovlanmanın mənbəyi olan heyvanı müəyyən etmək mümkün olmayıb. Genetik təhlil Uqandada aşkarlanan yoluxma hallarının KDR-dəki alovlanma ilə əlaqəli olduğunu təsdiqləməyə kömək edib.
Tədqiqatın müəllifləri hesab edirlər ki, testlərə və virusun sekvenləşdirilməsinə çıxış imkanlarının genişləndirilməsi gələcək alovlanmaları daha erkən müəyyən etməyə və onların yayılmasının qarşısını daha effektiv şəkildə almağa imkan verəcək. Bununla belə, Bundibucyo növlü Ebola virusuna qarşı hələlik təsdiqlənmiş peyvənd və ya müalicə üsulu mövcud deyil. Müvafiq preparatlar isə hazırlanma mərhələsindədir.
Avqustun 10-na olan məlumata görə, KDR-də epidemiyanın başlanmasından ötən üç ay ərzində qızdırmadan 2 000-ə yaxın insan vəfat edib.
