Son zamanlar Egey dənizində seysmik aktivliyin artması yunan adalarında böyük narahatlıq yaradıb. Xüsusən də dolanışığını turizmdən təmin edən adalar turistlərin təkanlardan təşvişə düşməsi ilə çətin dövr yaşayır.
Oxu.Az-ın xəbərinə görə, bu barədə "Haber Global"ın dərc etdiyi yazıda bəhs edilib.
Məlumata görə, Yunanıstan Seysmoloji İnstitutu son həftələrdə Egey dənizində 12 mindən çox təkan qeydə alıb ki, bunlardan bəzilərinin gücü 5 baldan çox olub. Həmçinin yeraltı təkanlar Santorini və Yamurgi kimi məşhur adalarda da hiss olunub. Bu yeraltı təkanların mümkün güclü zəlzələnin əlaməti ola biləcəyi ehtimalı əhali arasında təşvişə səbəb olub.
Qeyd edək ki, Yamurgi və Santorini Egey dənizinin ən çox ziyarət edilən adaları sırasındadır. Lakin son zamanlar baş verən təkanlar səbəbindən, demək olar, kimsəsiz qalıb. Qış aylarında, onsuz da, sakitliyin hökm sürdüyü adalarda indi əhalinin əksəriyyəti evlərini tərk etməməyə üstünlük verir.
Turizm sektoru xüsusilə yay mövsümü ərəfəsində böyük narahatlıq yaşayır. Santorinidəki hotel və iş yeri sahibləri son vaxtlar rezervasiyaların ləğvi hallarının artması səbəbindən maliyyə çətinlikləri ilə üzləşiblər. Səlahiyyətlilər sektora dəstək və stimul vermək məqsədilə müxtəlif tədbirlər üzərində işləyirlər.
Yamurgi adası sakinlərinin yaddaşında 1956-cı ildə baş vermiş böyük zəlzələ və ondan sonra gələn nəhəng dalğaların yaratdığı dağıntılar yer alır. İnsanlar hələ də zəlzələ ilə bağlı travmalarını xatırlamağa davam edirlər. Santorini minlərlə il əvvəl baş vermiş vulkan püskürmələri ilə tanınır. Hətta bu gün də adanın strukturunda bu vulkanik fəaliyyətlərin izlərini görmək mümkündür.
Son zamanlar zəlzələlərin tezliyinin artması alimləri regionda vulkanik aktivliyin yenidən başlaması ehtimalı ilə bağlı təşvişə salıb. Hazırda geoloqlar ərazidə vulkanik aktivliyi müşahidə edərək mümkün püskürmə ehtimalını qiymətləndirməyə çalışırlar.
Bölgədəki hökumət strukturları tərəfindən tikililərin dayanıqlılığının yoxlanması və böyük bir fəlakətə qarşı hazırlıq planlarının təcili işə salınması üzrə işlər davam etdirilir.
