İndoneziyada qorxunc hadisə baş verib.
55 yaşlı qadın 7 metrlik pitonun çənəsinə ilişib qalmış vəziyyətdə ölü tapılıb.
Oxu.Az-ın xəbərinə görə, bu barədə KP.ru məlumat verib.
Məlumata görə, Va Siti adlı qadın öz bağında tərəvəz yığdığı zaman ilan ona hücum edib.
Yoxa çıxan qadının oğlu La Faru narahat olub və onu axtarmağa gedib. Bağa çatdığı zaman anasını nəhəng pitonun çənəsində görüb. Qonşular köməyə qaçıblar, məşəl və maçete (baltaya oxşayan kənd təsərrüfatı aləti - red.) ilə qadını azad etməyə çalışıblar. Nəticədə, yerli sakinlər ilanı doğrayıblar, lakin Va Sitinin həyatını xilas etmək mümkün olmayıb.
"O, fermada işləyəndə mən həmişə narahat olurdum. Əvvəllər də böyük ilanlar görmüşdüm. O, körpəliyindən bəri fermada işləyirdi, ona görə də qorxmurdu", - deyə La Faru anası barədə danışıb.
Yerli hakimiyyət sakinlərə Sulavesinin cənub-şərqindəki Buton dairəsində ilan hücumlarından ehtiyatlı olmaları barədə xəbərdarlıq edib. İş orasındadır ki, İndoneziyanın sıx meşələrində, xüsusən də Sumatra və Yava kimi bölgələrdə çoxlu piton yaşayır.
