İsrail Yəmənin Hodeyda limanına zərbələr endirib.
Oxu.Az xəbər verir ki, bu barədə sentyabrın 16-da Yəmənin "Al Masirah" telekanalı məlumat yayıb.
Məlumata görə, İsrail Hərbi Hava Qüvvələri limana 12 zərbə endirib. Bildirilir ki, Yəmənin hava hücumundan müdafiə qüvvələri hazırda İsrail təyyarələrinin qarşısını almağa çalışır.
İsrail Müdafiə Ordusu (SAXAL) da Yəmən limanına zərbələr endirdiyini təsdiqləyib:
"Zərbə husilərin terror rejiminin İsrail dövlətinə qarşı dəfələrlə hücumlarına cavab olaraq endirilib", - məlumatda qeyd olunub.
İsrail ordusunun nümayəndəsi Avixay Edri Qırmızı dəniz sahilində yerləşən və üsyançı "Ənsar Allah" hərəkatının (husilərin) nəzarətində olan Yəmənin Hodeyda limanından təcili təxliyəyə çağırıb.
Oxu.Az-ın xəbərinə görə, bu barədə Avixay Edri öz "X" səhifəsində paylaşım edib.
O, paylaşımda təhlükəli ərazinin qırmızı rənglə işarələndiyi limanın peyk şəklini dərc edib.
İsrail ordusunun daha əvvəl Qəzza zolağı, Livan və Yəmən sakinlərinə etdiyi bu cür xəbərdarlıqlardan sonra göstərilən ərazilər hava hücumlarına məruz qalıb.
"Yəmənin Hodeyda limanında olan hər kəsə təcili xəbərdarlıq. İsrail ordusu husi terror rejiminin hərbi əməliyyatları səbəbi ilə yaxın saatlarda xəritədə qeyd olunan əraziyə hücum edəcək. Təhlükəsizliyiniz üçün Hodeyda limanında və orada dayanmış gəmilərdə olan hər kəsi dərhal təxliyə olunmağa çağırırıq", - deyə o yazıb.
