Türkiyənin İstanbul şəhərinin Eyüpsultan rayonunda leysan yağışları səbəbindən yol çöküb.
Oxu.Az "Haber Global"a istinadən xəbər verir ki, oktyabrın 14-də şəhərdə güclü yağış və fırtına təsirini göstərməyə başlayıb.
İstanbul Bələdiyyəsinin Təbii Fəlakətlərin və Risklərin İdarə Edilməsi İdarəsinin (AKOM) məlumatına görə, şəhərin şimal və mərkəzi rayonlarında hər kvadratmetrə 50-95 kiloqram yağıntı düşüb. Digər rayonlarda isə bu göstərici 10-40 kiloqram arasında dəyişib.
Güclü yağış nəticəsində şəhərin bir sıra ərazilərində subasmalar baş verib, bəzi yolları və yeraltı keçidləri su basıb. Sürücülər hərəkət etməkdə çətinlik çəkib, bəzi avtomobillər suda qalıb. Esenyurtda sel sularının apardığı qadın son anda xilas edilib.
AKOM və İstanbul valiliyi güclü yağış və fırtına ilə əlaqədar sakinlərə xəbərdarlıq edib. Küləyin sürətinin saatda 60-80 kilometrə çatacağı, yağışların isə oktyabrın 17-dək fasilələrlə davam edəcəyi proqnozlaşdırılır. Havanın temperaturunun mövsüm normasından 4-6 dərəcə aşağı düşəcəyi gözlənilir.
