Fransa rəsmiləri Parisdə Almaniyanın yenidən silahlanmasının miqyasından "təşviş və narahatlıq" keçirdiklərini bildiriblər. Fransada Almaniyanın hərbi kompleksinin güclənməsinin Berlinin Avropa müdafiəsində dominantlığına və milli müdafiə sektorunun zəifləməsinə səbəb olacağından ehtiyat edirlər.
Oxu.Az-ın məlumatına görə, "Bloomberg" bu barədə məlumat verir.
Agentlik qeyd edir ki, Fransa siyasi hakimiyyəti bir tərəfdən Almaniyanın müdafiə xərclərinin artmasını alqışlayır, digər tərəfdən isə Berlinin artan siyasi təsiri və hərbi mövqeyinin güclənməsindən narahatlıq keçirir.
Avropa parlamentinin üzvü Fransua-Ksavye Bellami agentliyə bildirib ki, "daxili siyasi qeyri-sabitlik Fransanın geosiyasi təsirini sarsıdır".
Alman Marşal Fondunun vitse-prezidenti Klaudiya Mayorun sözlərinə görə, İkinci Dünya müharibəsindən sonra Avropada Fransa geosiyasi lider, Almaniya isə iqtisadi nəhəng kimi qəbul olunub. Ekspertin fikrincə, indi Almaniya hər iki funksiyanı birləşdirərək təsirini genişləndirir ki, bu da Parisdə narahatlıq doğurur.
Almaniyanın müdafiə büdcəsinin artması 2025-ci ildə Haaqa şəhərində keçirilən NATO sammitinin qərarları ilə əlaqəlidir və orada Berlinə müdafiə xərclərini 2035-ci ilə qədər 3.5%-ə çatdırmaq tövsiyə olunub. NATO və əksər AB ölkələri bu tədbirləri təsdiqləyir, lakin Paris də daxil olmaqla bir neçə qərb ölkəsi Avropa inteqrasiyanı tənqid edən Almaniya üçün Alternativ Partiyasının (AfD) populyarlığından narahatdır. Bəzi ölkələr Berlində avropayönümlü olmayan bir hökumətin yaranmasından qorxurlar.
