Pentaqon ABŞ qoşunlarının Avropa qitəsindəki dislokasiyasının yenidən qiymətləndirilməsi prosesini sürətləndirmək və gələcək hərbi mövcudluq üçün bir neçə ssenari hazırlamaq qərarına gəlib.
Oxu.Az xəbər verir ki, bu barədə "Reuters" agentliyi ABŞ hərbi departamentinin daxili sənədinə istinadən məlumat yayıb.
Məlumatına əsasən, prosesin dekabrda yekunlaşdırılması planlaşdırılsa da, artıq noyabrın 6-dək ABŞ-nin hərb naziri Pit Heqsetə ən azı dörd fərqli variant təqdim olunacaq. Təklif edilən ssenarilər hərbçilərin sayına, dislokasiya yerlərinə, müddətlərə və maliyyə xərclərinə görə bir-birindən fərqlənəcək.
Hazırda Avropada 80 minə yaxın ABŞ hərbçisi xidmət edir və NATO müttəfiqləri bu sayın ciddi şəkildə azaldılmasından narahatdırlar. Vaşinqton yeni qərarlar qəbul edərkən müttəfiq dövlətlərin müdafiə xərclərini, onların Şimali Atlantika Alyansına verdiyi töhfələri, eləcə də hərbi bazalara və hava məkanına çıxış imkanlarını nəzərə alacaq.
Qeyd edək ki, bundan əvvəl ABŞ Almaniyada keçirilən təlimlərdən sonra Avropadakı zərbə PUA-larından ibarət eksperimental taborunu ləğv etmək qərarına gəlmişdi.
