Nepalda daşqınlar və torpaq sürüşmələri nəticəsində ölənlərin sayı artıb.
Oxu.Az-ın xəbərinə görə, bu barədə Çin Mərkəzi Televiziyası Nepalın Fəlakət Risklərinin Azaldılması və Aradan Qaldırılması Milli İdarəsinə istinadən xəbər verir.
Sentyabrın 1-də yerli vaxtla saat 9:00-a (Bakı vaxtı ilə saat 7:00) olan məlumata görə, ölənlərin sayı 1010-a çatıb.
Qeyd edək ki, daha əvvəl Nepalda baş verən daşqınlar və güclü torpaq sürüşmələri nəticəsində həyatını itirənlərin sayı 951 nəfər təşkil edirdi.
Xatırladaq ki, təbii fəlakət avqustun 26-da səhər Nepalın şimalında baş verib. İlkin məlumatlara görə, daşqına səbəb "Rasuvaqadxi" sərhəd-keçid məntəqəsindən təxminən 20 kilometr şimal-şərqdə, Çinlə sərhəddə baş verən buz uçqunu olub. Su, palçıq və qaya parçalarından ibarət olan güclü axın çay yatağı boyunca yüksək sürətlə 70 kilometrdən çox məsafə qət edərək, yaxınlıqdakı yaşayış məntəqələrini dağıdıb və böyük ərazini su altında qoyub.
