Nepalda Everest bölgəsindəki Periçe kəndində iki helikopter eniş edərkən toqquşub. Hadisə nəticəsində bir turist ölüb.
Oxu.Az-ın xəbərinə görə, bu barədə "SHOT" "Telegram" kanalı rusiyalı bələdçiyə istinadən məlumat verib. Həmçinin yerli KİV də Nepal polisinə istinadən bir əcnəbinin ölümü barədə yazıb.
"Bir nəfər ölüb, üç nəfər yaralanıb", - deyə yerli polisin "Facebook" səhifəsində yayımlanan açıqlamada bildirilib.
Hüquq-mühafizə orqanlarının əməkdaşları ölən şəxsin Hindistan vətəndaşı olduğunu dəqiqləşdiriblər. Digər sərnişin - hindistanəsilli Yeni Zelandiya vətəndaşı xəsarət alıb və hava yolu ilə xəstəxanaya çatdırılıb.
Hər iki pilot yüngül xəsarətlər alıb və müalicə üçün Katmanduya aparılıb.
Qeyd edilir ki, "Fishtail Air" və "Air Dynasty" şirkətlərinin helikopterləri "Edelweiss Pheriche" hotelinin yaxınlığındakı eyni meydançaya eniş etmək istəyib. Toqquşmadan sonra hər iki helikopter yerə çırpılıb.
Yaxınlıqda bellərində çantaları olan onlarla turist olub ki, bələdçinin sözlərinə görə, təyyarənin qalıqları onların istiqamətinə də uçub.
Toqquşmanın səbəbləri və xəsarət alanlar haqqında məlumatlar dəqiqləşdirilir.
