"Polşa Prezidenti Karol Navrotski daim sosial şəbəkələrdə təhdid olunur".
Oxu.Az xəbər verir ki, bunu ölkənin rəqəmsallaşdırma naziri Kşiştof Qavkovski TVP telekanalına bildirib.
"Biz sosial şəbəkələrdəki istənilən qanunsuz materiallar, xüsusən də dövlətin ən yüksək şəxslərinin, məsələn, Polşa prezidentinin ünvanına təhdidlər barədə daim məlumat veririk. Bu gün növbəti belə hadisə baş verib", - deyə nazir qeyd edib.
O bildirib ki, söhbət Polşa prezidentinə qarşı sui-qəsd təşkil etmək çağırışından gedir. Belə ki, polis "X" sosial şəbəkəsində prezidentin şəkli üzərində tapança təsvirini və "Görüşənədək, Karolek!" sözlərini yerləşdirmiş 19 yaşlı Polşa vətəndaşını müəyyən edərək həbsə alıb.
Qavkovski bildirib ki, başçılıq etdiyi nazirlik dövlətin yüksəkvəzifəli şəxslərinə qarşı təhdidləri aşkar etmək üçün sosial şəbəkələri daim monitorinq edir və onları aşkar etdikdə məlumatları polisə və xüsusi xidmət orqanlarına ötürür.
Xatırladaq ki, Karol Navrotski iyunun 1-də Polşada keçirilmiş prezident seçkisinin ikinci turunda qalib gəlib, avqustun 6-da prezident səlahiyyətlərinin icrasına başlayıb.
