Qrossi: "İsfahana hücum nəticəsində uran konversiya zavodu zədələnib"

"İsrail və İran arasında artan hərbi gərginlik fonunda Beynəlxalq Atom Enerjisi Agentliyi (BAEA) İranda nüvə zəmanətlərinin yerinə yetirilməsini yoxlamağa yalnız təhlükəsizlik vəziyyəti imkan verdikdə davam edəcək".

Oxu.Az-ın TASS-a istinadla verdiyi məlumata görə, bu barədə BAEA-nın baş direktoru Rafael Qrossi agentliyin İdarə Heyətinin növbədənkənar sessiyasının açılışında bəyan edib.

Onun sözlərinə görə, BAEA-nın İranı tərk etmək niyyəti yoxdur. O vurğulayıb ki, hazırkı hərbi eskalasiya İranın nüvə proqramı ilə bağlı diplomatik həll yoluna nail olunması prosesini ləngidir.

Qrossi bildirib ki, o, İranda fəaliyyət göstərən BAEA müfəttişləri ilə əlaqə saxlayır, eyni zamanda İran hakimiyyəti ilə əməkdaşlıq və məlumat mübadiləsinin aparıldığını qeyd edib.

"Fordoda yanacaq zənginləşdirmə obyekti və tikilməkdə olan Xondab ağırsu reaktorunda hər hansı ziyan qeydə alınmayıb. "Buşehr" AES son hücumların hədəfi olmayıb və onlardan zərər görməyib. Eyni sözləri Tehran tədqiqat reaktoru haqqında da demək olar".

Bununla belə, Qrossi təsdiqləyib ki, cümə günü İsfahan şəhərinə edilən hücum nəticəsində dörd bina - o cümlədən kimya laboratoriyası və uran konversiya obyekti zərər görüb.

Natanzdakı uran zənginləşdirmə zavodunun yerüstü hissəsi isə hücum nəticəsində məhv edilib.

Qrossinin sözlərinə görə, obyektin hüdudlarından kənarda radiasiya səviyyəsi normaldır, lakin daxilində həm radiasiya, həm də kimyəvi çirklənmə qeydə alınıb.