Slovakiya Respublikasının Baş naziri Robert Fitsonun ömürlük maliyyə təminatının ləğv olunması ilə əlaqədar təşkil edilən referendum çərçivəsində səsvermə məntəqələri fəaliyyətə başlayıb.
Oxu.Az xəbər verir ki, bu barədə iyulun 4-də ölkənin Daxili İşlər Nazirliyinin rəsmi internet səhifəsində məlumat dərc edilib.
Məlumata görə referendum yerli vaxtla saat 07:00-dan (Bakı vaxtı ilə saat 09:00) saat 22:00-dək keçiriləcək.
Səsvermə zamanı ölkə vətəndaşları iki əsas sualı cavablandırmalıdırlar: baş nazirə verilən ömürlük pensiyanın dayandırılması və mütəşəkkil cinayətkarlıqla mübarizə aparan milli agentliklə xüsusi prokurorluğun yenidən qurulması.
İyunun 28-də "Ipsos" sosioloji tədqiqat agentliyinin açıqladığı rəqəmlərə əsasən, Fitsonun ömürlük təminatdan məhrum edilməsinə dair səsvermədə əhalinin sadəcə 26.5%-i iştirak etməyi düşünür. Sorğunun nəticələri göstərir ki, iştirakçıların 73.5%-i iyulun 4-də təşkil olunacaq səsverməyə qatılmaq fikrində deyil. Seçici fəallığının bu qədər aşağı olması səbəbindən referendumun etibarlı sayılmayacağı ehtimal edilir.
