Kanadanın Ontario əyalətinin dövlət qurumları xəritələrində Ontario gölünü "Amerika gölü" adı ilə göstərməyə başlayıblar.
Oxu.Az "CTV News"a istinadən xəbər verir ki, yeni ad Toronto ictimai nəqliyyatına cavabdeh olan "Metrolinx" agentliyinin, alkoqol məhsullarının satışına nəzarət edən LCBO-nun rəsmi saytlarında, eləcə də "Hydro One" regional elektrik şəbəkəsi operatorunun xəritələrində qeydə alınıb.
Ontario əyaləti hökumətinin nümayəndəsi "X" sosial şəbəkəsində vəziyyəti dövlət təşkilatlarının xəritə məlumatlarını birbaşa "Google" şirkətindən alması ilə izah edib. O bildirib ki, hazırda bütün dövlət qurumlarının saytları yoxlanılır ki, xəritələrdə "düzgün ad" istifadə olunsun.
* "Google Maps" qalmaqallı Ontario gölünün adını dəyişdi
Daha əvvəl "Google" "Amerika gölü" adının yalnız ABŞ-dəki istifadəçilər üçün göstəriləcəyini bildirmişdi. Kanada sakinləri üçün əvvəlki adın saxlanılması, digər ölkələrdə isə hər iki variantın göstərilməsi nəzərdə tutulurdu.
Xatırladaq ki, ABŞ Prezidenti Donald Tramp avqustun 27-də "TikTok"da paylaşdığı videoda Ontario gölünün adını şəxsən "Amerika gölü" olaraq dəyişdirdiyini nümayiş etdirmişdi. Kanada hökuməti isə bu addımı tanımadığını və gölün əvvəlki adını qoruyacağını açıqlamışdı.
