Türkiyə Xarici İşlər Nazirliyi Fransanı ölkədəki məhkəmə proseslərinə müdaxilə etmək cəhdində ittiham edib və Parisi respublika qanunlarına hörmət etməyə çağırıb.
Oxu.Az bildirir ki, bu barədə "Haber Global" məlumat yayıb.
Bəyanatda deyilir:
"Fransanın ölkəmizdə davam edən məhkəmə proseslərinə müdaxilə xarakteri daşıyan bəyanatını birmənalı şəkildə rədd edirik. Türkiyə qanunun aliliyinə uyğun olaraq bütün vətəndaşları üçün ədalətli və qərəzsiz məhkəmələrə zəmanət verir. Bütün bunlar Türkiyə konstitusiyasına və ölkə qanunvericiliyinə uyğun olaraq müstəqil məhkəmələr tərəfindən həyata keçirilir.
Fransada əsas müxalifət liderinin məhkəmə qərarı ilə həbsə məhkum edilməsi və seçkilərdə iştirakının qadağan edilməsi, bəzi bələdiyyə sədrlərinə qarşı məhkəmə prosesinin davam etməsi, bu bəyanatın ikili standartlardan ibarət olduğunu göstərir. Biz Fransaya öz daxili qanunvericiliyimizə və məhkəmə sisteminin müstəqilliyinə hörmətlə yanaşmağı, başqa ölkələrə qarşı siyasi motivli bəyanatlar verməkdən çəkinməyi, öz daxili məsələlərinə diqqət yetirməyi tövsiyə edirik".
Xatırladaq ki, Türkiyənin hüquq-mühafizə orqanları 3 böyük şəhərin - Adana, Antalya və Adıyamanın CHP-dən olan bələdiyyə sədrlərini korrupsiya faktları ilə bağlı araşdırma çərçivəsində saxlayıb.
Fransa Xarici İşlər Nazirliyi də bir neçə müxalifət üzvünün həbsindən "dərin narahatlığını" ifadə edərək, rəsmi Ankaranı "yerli sakinlərin və müxalifət deputatlarının hüquqlarına hörmət etməyə, ədalətli mühakimə hüququnu, ifadə azadlığını təmin etməyə" çağırıb.
