Bu gün saat 04:30-da M.Nəcəfov MAN markalı qoşqulu yük avtomobili ilə Bakı-Quba yolunun 16-cı kilometrində hərəkətdə olarkən texniki nasazlıq səbəbindən qəza törədib.
Belə ki, maşının qoşqusu açılaraq körpüyə çırpılıb.
Oxu.Az xəbər verir ki, bu barədə Baku.ws-in sorğusuna cavab olaraq Baş Dövlət Yol Polisi İdarəsindən məlumat verilib.
Bildirilib ki, hadisə barədə məlumat daxil olduqdan dərhal sonra Yol Patrul Xidmətinin əməkdaşları əraziyə cəlb olunublar.
Hadisə yerində yol hərəkətinin təhlükəsizliyinin təmin edilməsi və digər nəqliyyat vasitələri üçün yarana biləcək təhlükənin qarşısının alınması məqsədilə zəruri tədbirlər görülüb.
"Qəza nəticəsində hərəkət hissəsində qalan yük avtomobili operativ şəkildə yoldan kənarlaşdırılıb və nəqliyyat vasitələrinin təhlükəsiz hərəkəti təmin edilib", - məlumatda deyilir.
