Zəngilan rayonunda Həkəri çayında baş verən bədbəxt hadisə ilə bağlı təfərrüat məlum olub. İyulun 4-də 1962-ci il təvəllüdlü Nüşrəvan Həsənovun Həkəri çayının Ağalı kəndindən keçən hissəsində batdığı bildirilir.
Oxu.Az xəbər verir ki, bu barədə Baku TV-nin videomaterialında deyilir.
Hadisənin şahidi olan qardaşı Vaqif Həsənovun sözlərinə görə, həmin vaxt çayda suyun səviyyəsi aşağı olsa da, qəflətən gələn sel onu aparıb.
Axtarışların artıq dörd gündür davam etdiyini bildirən digər qardaşı İmaməli Həsənov işlərin lazımi səviyyədə aparılmadığını iddia edərək narazılığını bildirib:
"Mənim qardaşım dörd gündür yoxdur. Heç kəs də baxmır. Dörd gün orada adam qalar?"
O, fövqəladə hallar qurumlarından suyun qarşısının kəsilərək səviyyəsinin azaldılmasını, bu yolla qardaşının meyitinin tapılmasını xahiş edib.
İtkin düşən şəxsin həyat yoldaşı Qiyafət Həsənova isə aidiyyəti qurumlara müraciət edərək, yoldaşının meyitinin tapılaraq onlara təhvil verilməsini istəyir.
