Bakının Yasamal rayonunda, Mirəli Seyidov küçəsində yerləşən "Loft Dent" stomatoloji klinikasında baş vermiş və insan ölümü ilə nəticələnmiş yanğın hadisəsi ilə bağlı zərərçəkmişlər obyektin sahibi Vüqar Abbasovun məsuliyyətə cəlb olunmasını tələb edirlər.
Bu barədə Oxu.Az-a açıqlamasında hadisə nəticəsində 7 yaşlı övladı həlak olan Əli Qəmbərov deyib. O bildirib ki, iş üzrə təqsirləndirilən şəxs Bəhruz Paşayevi tanımırlar:
"Mən hadisə nəticəsində həyatını itirən Arzu Qəmbərlinin atasıyam. Hadisəyə görə əsas məsuliyyət daşıyan şəxslərdən biri "Loft Dent" obyektinin sahibi Vüqar Yusif oğlu Abbasovdur. Lakin həmin şəxs məsuliyyətə cəlb edilməyib. Vüqar Abbasov yanğın təhlükəsizliyi qaydalarının təmin edilməməsində təqsirlidir. O da cinayət məsuliyyətinə cəlb olunmalıdır və barəsində qanunamüvafiq tədbirlər görülməlidir. Amma bu gün təqsirləndirilən şəxs kimi müttəhim kürsüsünə Bəhruz Paşayev çıxarılır. Hansı ki, Bəhruz Paşayevin həmin binada yanğın təhlükəsizliyi görmək səlahiyyəti olmayıb. Həmin məsələyə birbaşa obyekt sahibi cavabdeh olub və təhlükəsizlik tədbirlərini də o görməli idi. Amma Vüqar Abbasov məsuliyyətdən kənarda qalıb".
Ə.Qəmbərov bildirib ki, iş üzrə Bakı Ağır Cinayətlər Məhkəməsində keçirilən prosesdə zərərçəkmişlər Vüqar Abbasovun məsuliyyətə cəlb edilməsini istəyiblər.
Qeyd edək ki, 2025-ci il noyabrın 21-də paytaxtın Yasamal rayonu, Mirəli Seyidov küçəsində yerləşən çoxmərtəbəli yaşayış binasında baş verən yanğınla əlaqədar Baş Prokurorluğun Kriminalistika və informasiya texnologiyaları idarəsində cinayət işi başlanıb və ibtidai istintaq aparılıb.
İstintaq zamanı aidiyyəti dövlət qurumlarının, o cümlədən Fövqəladə Hallar Nazirliyinin əməkdaşlarının və müvafiq ekspertlərin iştirakı ilə hadisə yerinə baxış keçirilib, maddi sübutlar götürülüb və çox sayda istintaq hərəkəti icra edilib.
İstintaqla müəyyən edilib ki, binanın zirzəmisində baş vermiş yanğın nəticəsində üç sakin - Arzu Qəmbərli, Samir Məhəmmədov və Könül Hümbətova həlak olublar, 25 nəfər tüstüdən zəhərlənib. Həmçinin müxtəlif şəxslərə məxsus əmlaka ziyan dəyib.
Bundan başqa, istintaq zamanı hadisənin baş verdiyi binanın zirzəmi qatında və birinci mərtəbəsində yerləşən qeyri-yaşayış obyektini icarəyə götürmüş "TAXES GROUP" MMC-nin ("Loft Klinika) qanuni təmsilçisi və direktoru Bəhruz Paşayevin üzərinə yanğın təhlükəsizliyi qaydalarına riayət edilməsi vəzifəsi qoyulmuş şəxs kimi həmin qaydaları pozduğu müəyyən edilib. Onun ehtiyatsızlıqdan üç nəfərin ölümünə və digər ağır nəticələrə səbəb olmasına əsaslı şübhələr var.
Noyabrın 23-də Bəhruz Paşayev şübhəli şəxs qismində tutulub, noyabrın 24-də isə Azərbaycan Respublikası Cinayət Məcəlləsinin 225.3-cü (yanğın təhlükəsizliyi qaydalarını pozma ehtiyatsızlıqdan iki və daha çox şəxsin ölümünə səbəb olduqda) maddəsi ilə təqsirləndirilən şəxs qismində cəlb edilib.
İstintaq orqanının vəsatəti və ibtidai araşdırmaya prosessual rəhbərliyi həyata keçirən prokurorun təqdimatı əsasında Binəqədi Rayon Məhkəməsinin qərarı ilə Bəhruz Paşayev barəsində həbs qətimkan tədbiri seçilib.
Onu da qeyd edək ki, hadisə zamanı həyatını itirən Arzu Qəmbərli Vəkillər Kollegiyasının üzvü Əli Qəmbərovun övladı olub. Digər həlak olan Könül Hümbətova isə Bakı Milli Geyim Evinin rəhbəri olub.
