Karate üzrə beşqat dünya çempionumuz, “Brilyant oğlan” Rafael Ağayev zədələndiyi üçün hazırlıqlardan və qarşıdakı yarışdan azad olunub.
Oxu.Az xəbər verir ki, iyunun son günləri Minskdə II Avropa Oyunlarında iştirak edəcək karateçilər və milli komandanın əvəzedici heyətinin bir sıra üzvü müxtəlif ölkələrdə təlim-məşq toplanışına yola düşüb.
Baş məşqçi Bahəddin Kandaz və böyük məşqçi Qurban Tağıyevin rəhbərliyi ilə Honq Konqa yola düşən heyətdə Firdovsi Fərzəliyev (-60 kq), Rafiz Həsənov (-67 kq), Asiman Qurbanlı (+84 kq), eləcə də, Ayxan Mamayev, Turqut Həsənov və Pənah Abdullayev (üçü də -84 kq) yer alıb.
İyunun 5-dək təlim-məşq toplanışında olan karateçilər ordan birbaşa 7-9 iyunda Çinin Şanxay şəhərinə Karate1 Premyer Liqasına yollanacaq. Bu mötəbər yarışda onlara Şahin Atamov (+84 kq), Roman Heydərov (kata) və İrina Zaretskaya (-68 kq) da qoşulacaq.
Bu ay keçirilmiş İstanbul A Seriyası turnirində zədələnmiş millimizin lideri Rafael Ağayev (-75 kq) isə toplanış və qarşıdakı turnirdən azad olunub. Oyunların daha bir iştirakçısı Nuranə Əliyeva (-50 kq) və digər heyət üzvləri Bakıda milli komandanın böyük məşqçisi Şahin Xudaverdiyevlə hazırlıqlarını davam etdirəcək. Beynəlxlaq hakimlərimiz Cahangir Babayev və Vüqar Kərimov yarışı idarə edən referilər arasında olacaq.
II Avropa Oyunlarına vəsiqə qazanan digər idmançılarımız Roman Heydərov kata üzrə baş məşqçi Vahid Ayvazovla birgə 26 may-3 iyun tarixlərində Belarusun paytaxtı Minskdə təlim-məşq toplanışında iştirak edəcək. İrina Zaretskaya (-68 kq) ilə qadınların baş məşqçisi Denis Morozov isə 31 may-3 iyun tarixlərində Almaniyanın Düsseldorf şəhərində hazırlıqlarda olacaq.
Qeyd edək ki, milli komanda 11 iyunda Bakıya dönüb II Avropa Oyunlarına hazırlıqları davam etdirəcək.
Səbuhi MUSAYEV
