Paris Sen-Jermen yarımmüdafiə xəttində dəyişiklik etmək istəyir.
Oxu.Az "L'Équipe" nəşrinə istinadən xəbər verir ki, "Çelsi"yə qarşı gözlənilməz məğlubiyyət Fransa komandasının yarımmüdafiədə təcrübə və ustalığını şübhə altına alıb.
Bildirilir ki, Luis Enrikenin yarımmüdafiədə kifayət qədər gənc istedadları var, lakin indi komandanın tempini və tarazlığını qorumaq üçün ona təcrübəli oyunçu lazımdır.
Məlumata görə, hazırda PSJ "Coşua Kimmixə bənzər yarımmüdafiəçi" axtarır. O, - Joao Neves və Zair-Emeri ilə birlikdə oynaya biləcək 30 yaşdan yuxarı şəxs olmalıdır. "Bavariya" Kimmix üçün 45 milyon avro, "İnter" isə Çalhanoğlu üçün 25-30 milyon avro tələb edir ki, bu da Fransa klubunu cəlb edir.
Qeyd edilir ki, Çalhanoğlu həmişə "Qalatasaray"da oynamağı arzulayıb, lakin Luis Enrikenin xarizması onu razı sala bilər.
Düzdür, "İnter"in vitse-prezidenti Xavyer Zanettinin sözlərinə görə, Çalhanoğlu məsələsi "süni problemdir". O bəyan edib ki, futbolçu komandanın təlim-məşq toplanışında olacaq və transfer şayiələrini arxada qoyacaq.
Xatırladaq ki, "İnter" "Qalatasaray"ın Çalhanoğlu üçün təxminən 10 milyon avroluq təklifi rədd edib. PSJ-nin işə qarışması "Qalatasaray"ı öz təklifini artırmağa məcbur edə bilər.
