Çin Peşəkar Futbol Liqası "Çançun Sidu" klubunu rəqib komandanın paltardəyişmə otağında lənət yazıları (cadu) yerləşdirdiyinə görə 30 min yuan (təxminən 4.1 min ABŞ dolları) məbləğində cərimələyib.
Oxu.Az-ın verdiyi məlumata görə, bu barədə təşkilatın mətbuat xidməti məlumat yayıb.
Bildirilib ki, komandaya, həmçinin liqa rəhbərliyi tərəfindən qeyri-idman və müasir futbol ruhuna zidd hesab edilən hərəkətlərinə görə ciddi töhmət verilib.
"Oyunöncəsi "Çançun Sidu" klubunun əməkdaşları qonaq komandanın istirahət zonasına feodal dövrünün mövhumat xarakterli əşyalarını yerləşdiriblər, bu isə mənfi nəticələrə səbəb olub", - deyə məlumatda bildirib.
Hadisə iyunun 28-də "Çançun Sidu"nun öz meydanında "Şansi Çundə Junhay" komandasını qəbul etdiyi zaman baş verib. Qonaq komandanın futbolçuları öz soyunub-geyinmə otaqlarında "Şansi Çundə Junhay" komandasının məğlubiyyətə məhkum olsun" yazılmış ənənəvi sarı kağızlar tapıblar.
Diqqətəlayiq haldır ki, ev sahibləri həqiqətən də 2:0 hesabı ilə qələbə qazanıblar, bu da belə qeyri-adi hadisə ətrafında rezonansı daha da gücləndirib.
Qeyd edək ki, "Çançun Sidu" klubu İkinci Liqada çıxış edir. 17 turun ardından komanda Şimal divizionunda ikinci yeri tutur və 33 xalla lider "Usi Uqou" klubundan bir xal geri qalır.
