Milli komandamızın ev oyunlarını keçirdiyi "Dalğa Arena" təmir olunacaq?

Azərbaycanın futbol millisi, "Zirə", "Araz-Naxçıvan" və "Neftçi" klublarının bəzi ev oyunlarını keçirdikləri "Dalğa Arena"nın təmir edilməmə səbəbi bəlli olub.

Bu barədə Oxu.Az-a açıqlama verən AFFA-nın Mətbuat Xidmətinin rəisi Elnur Məmmədli stadionda hazırda təmir işlərinin aparılmasının mümkün olmadığını deyib.

"Yay aylarında havaların isti keçməsi ilə əlaqədar bəzi stadionların ot örtüyündə müəyyən problemlər yaranır. Bununla yanaşı, nəzərə almaq lazımdır ki, "Dalğa Arena"da yüklənmə çoxdur. Bildiyiniz kimi, "Zirə" avrokubokun ev oyunlarını bu arenada keçirir. Bundan başqa, "Araz-Naxçıvan" komandası Azərbaycan Premyer Liqasında rəqiblərini bu stadionda qəbul edir. "Neftçi Arena"nın ot örtüyündə problemlər yarandığından "Neftçi" klubunun da bəzi ev oyunlarının "Dalğa Arena"da keçirilməsi nəzərdə tutulub. Bir sözlə, stadionda qrafik çox sıxdır. Buna görə hazırda stadionun ot örtüyünü ideal vəziyyətə gətirmək üçün təmirə dayanması mümkün deyil", - deyə E.Məmmədli bildirib.