Boks üzrə üçqat Olimpiya çempionu Feliks Savon Kubada küçədə yemək axtararkən kameraya düşüb.
Oxu.Az Cibercuba.com portalına istinadən xəbər verir ki, hadisənin görüntüləri sosial şəbəkələrdə yayılıb.
Videoda bir nəfərin avtomobillə Savona yaxınlaşaraq ondan nə etdiyini soruşduğu görünür. Boksçu isə "Yemək toplayıram. Qidalanmaq üçün yemək", - deyə cavab verir.
17 saniyəlik video yayımlandıqdan cəmi bir gün sonra bir milyondan çox baxış toplayıb. Qısa müddət sonra kubalı komik Limay Blanko sosial şəbəkə hesablarında Savona ərzaq yardımı etdiyi anları əks etdirən görüntüləri paylaşıb.
Qeyd edək ki, 59 yaşlı Feliks Savon boks tarixinin tanınmış idmançılarından biridir. O, 1992, 1996 və 2000-ci illərdə keçirilən Yay Olimpiya Oyunlarında qızıl medal qazanıb.
