Psixoloji yardım barədə təhlükəli illüziya - Dərdi "ChatGPT"yə danışmağın RİSKLƏRİ açıqlandı

Süni intellektin (Sİ) psixoloji dəstək sahəsində istifadəsi təhlükəli nəticələrə səbəb ola bilər.

Oxu.Az-ın gazeta.ru-ya istinadən verdiyi məlumata görə, bu barədə tanınmış rusiyalı psixoloq Yekaterina Orlova xəbərdarlıq edib.

Mütəxəssis vurğulayıb ki, insanın ən şəxsi və həssas məlumatlarını çatbota və ya "ChatGPT" kimi digər Sİ sistemlərinə etibar etməsi şəxsi məlumatların təhlükəsizliyi baxımından ciddi risklər yaradır:

"Ən narahatedici məqam şəxsi məlumatların həssaslığıdır. İnsanların qorxuları, travmaları və səmimi etirafları süni intellekt sistemlərinə ötürüldükdə, bu məlumatlar bəzən kibercinayətkarların əlinə keçə bilər", - deyə Orlova bildirib.

Psixoloqun sözlərinə görə, süni intellekt insan duyğularını tam şəkildə anlaya bilmir, çünki o, nə hiss edir, nə də empatiya qurur:

"Sİ qeyri-verbal siqnalları analiz edə bilmir. O, insanın səsini, baxışını, davranışındakı incə dəyişiklikləri hiss edə bilmədiyi üçün emosional baxımdan kritik vəziyyətlərdə düzgün reaksiya verməyə bilər. Bu isə təhlükəli nəticələr doğura bilər", - deyə mütəxəssis əlavə edib.

Orlova qeyd edib ki, bu texnologiyaların istifadəsində başqa bir təhlükə də ondan ibarətdir ki, insanlar Sİ-yə həddindən artıq güvənərək peşəkar mütəxəssisə müraciəti təxirə sala bilərlər:

"İnsanlar bəzən süni intellekti çıxış yolu kimi qəbul edib real terapevtdən uzaqlaşırlar. Bu isə kritik hallarda sağalmaz psixoloji nəticələrə gətirib çıxara bilər. Nəticədə insan nəzarətdən kənarda qalır", - deyə psixoloq xəbərdarlıq edib.

Mütəxəssis çıxış yolunu insan psixoloqları ilə texnologiyanın balanslı şəkildə birləşdirilməsində görür:

"Ən ideal model süni intellektin psixoloq və psixoterapevtlərin peşəkarlığı ilə birlikdə işləməsidir. Texnologiya alət kimi istifadə edilməli, insan ünsiyyətini əvəz etməməlidir".