“Başak İnam Sığorta” şirkəti səhmdarlarının ümumi yığıncağının aprelin 4-də olacağı barədə məlumat yayıb.
Oxu.Az Turan-a istinadən xəbər verir ki, gündəlikdəki əsas məsələ şirkətin könüllü ləğv edilməsidir.
“Başak İnam Sığorta” İH sədrinin müavini Vaqif Baxşıyev bildirib ki, şirkətin ləğvedilmə səbəbi “Zaminbank” və “Gəncəbank”ın bağlanmasıdır.
“Zaminbank” bizim təsisçimiz idi. Vəsaitlərimiz bu iki bankda olub. Onlar bağlanandan sonra şirkətimiz Maliyyə Bazarlarına Nəzarət Palatasının tələblərinə və qanunvericiliyin məcmu kapital tələbinə (5 mln manat) cavab verə bilmədi”, - deyə o bildirib.
“Başak İnam Sığorta”nın planlaşdırılan ləğvi barədə fevralda jurnalistlərə Maliyyə Bazarlarına Nəzarət Palatasının sədri R.Aslanlı məlumat verib və qeyd edib ki, artıq razılıq verilib. Xatırladaq ki, “Zaminbank” və “Gəncəbank”ın lisenziyası 2016-cı ildə ləğv edilib.
Azərbaycan-Türkiyə birgə şirkəti olan “Başak İnam Sığorta” 1996-cı ildə yaradılıb. Türkiyə tərəfindən təsisçi “Başak Sığorta”, Azərbaycan tərəfdən “İnam” təkrarsığorta idi. Onu ABB, “Turanbank” və “Aqrarkredit” təsis edib.
Şirkətin nizamnamə kapitalı 7 mln. manat idi.
U.A.
www.oxu.az
