"Naxçıvan Muxtar Respublikası Azərbaycan ərazisində hər kvadratmetrə düşən Günəş enerjisinin həcminə görə lider mövqedə dayanır".
Oxu.Az-ın Naxçıvana ezam olunmuş müxbiri xəbər verir ki, bunu Energetika Nazirliyinin (EN) Enerji səmərəliliyi şöbəsinin müdiri Cahid Mikayılov "Merlər Razılaşması - Şərq Tərəfdaşlığı" təşəbbüsü ilə bağlı keçirilən tədbirdə deyib.
Nazirlik nümayəndəsi qeyd edib ki, Merlər Razılaşması təşəbbüsü xüsusi əhəmiyyət daşıyır:
"Bu təşəbbüsə qoşulmaq inzibati binaların isitmə xərclərinin azaldılması, istilik izolyasiyasının gücləndirilməsi, sosial obyektlərin enerji sərfiyyatının optimallaşdırılması, LED işıqlandırma sistemlərinə keçid kimi bir çox enerji səmərəliliyi tədbirlərinə dəstək göstərə bilər. Enerji səmərəliliyi Azərbaycan Prezidenti İlham Əliyevin rəhbərliyi altında həyata keçirilən enerji siyasətinin əsas prioritet istiqamətlərindəndir".
Nazirlik rəsmisi vurğulayıb ki, enerji səmərəliliyi sahəsində ölkəmizdə görülən işlər çoxşaxəlidir və onların hamısını sadalamaq mümkün deyil, ancaq xüsusilə bu gün bələdiyyələrimiz üçün maraqlı ola biləcək mövzu Enerji Effektivliyi Fondunun yaradılmasıdır:
"Merlər Razılaşmasına qoşulmuş və Fəaliyyət Planlarını təsdiqlətmiş bələdiyyələrimiz bu fonda müraciət edərək pilot layihələr həyata keçirə bilərlər. Pilot layihələr binaların enerji effektivliyinin artırılması, izolyasiyası, istilik sistemlərinin təkmilləşdirilməsi, enerji effektivliyi yüksək olan avadanlıqların tətbiqi, o cümlədən Günəş panellərinin tətbiqi kimi sahələri əhatə edə bilər".
Cahid Mikayılov xatırladıb ki, Qarabağ və Şərqi Zəngəzur iqtisadi rayonları ilə yanaşı, Naxçıvan Muxtar Respublikası da yaşıl enerji zonası elan edilib:
"Naxçıvan ölkəmizdə bir kvadratmetr əraziyə düşən Günəş işığının miqdarına görə birinci yerdədir. Yaşıl enerjinin həm qoyuluş gücündə, həm də istehsalında da Naxçıvan birinci yerdədir. Enerji səmərəliliyi də yaşıl enerjinin bir növüdür. Hətta yaşıl enerji qənaət edilən enerjidir. Enerji səmərəliliyi iqtisadi faydalar, ətraf mühitin qorunması və gələcək nəsillərə daha sağlam mühitin ötürülməsi deməkdir".
Məlik Məlikov
