Çepmen Universiteti və Los-Ancelesdəki Kaliforniya Universitetinin tədqiqatçıları müəyyən ediblər ki, heç vaxt ailə həyatı qurmayan kişilər bioloji səviyyədə evli həmcinslərinə nisbətən daha sürətlə qocala bilərlər.
Oxu.Az xəbər verir ki, müvafiq elmi iş "Frontiers in Aging" jurnalında dərc edilib. Mütəxəssislər 762 ABŞ sakininin məlumatlarını araşdıraraq, epigenetik qocalmanın iki göstəricisi - "GrimAge" və "DunedinPACE" üzrə fərqlər aşkar ediblər.
Epigenetik qocalma orqanizmdəki proseslərin insanın bioloji yaşına nə dərəcədə uyğun gəldiyini və ya onu nə qədər qabaqladığını göstərir. Qiymətləndirmə üçün alimlər genlərin fəaliyyətinə təsir edən kimyəvi işarələr olan DNT metilləşməsindəki dəyişiklikləri öyrəniblər.
Tədqiqat zamanı üç alətdən istifadə olunub: bioloji yaşı müəyyən edən "PhenoAge" və "GrimAge", eləcə də orqanizmin qocalma sürətini göstərən "DunedinPACE". Ən diqqətçəkən fərq heç vaxt evlənməyən kişilərdə qeydə alınıb.
"GrimAge" və "DunedinPACE" göstəricilərinə görə, onlarda evli kişilərlə müqayisədə sürətlənmiş epigenetik qocalma əlamətləri müşahidə edilib. Tədqiqatçılar qadınlarda belə bir əlaqə tapmayıblar. Bununla yanaşı, nikahda olmaq faktının özü boşanma və ya ayrı yaşamaqla müqayisədə "DunedinPACE" göstəricisi üzrə epigenetik qocalma sürətinin daha yavaş olması ilə əlaqələndirilib.
Təhlilə orta və yaşlı insanların sağlamlığına həsr olunmuş "Midlife in the United States" (MIDUS) adlı Amerika tədqiqatından 382 kişi və 380 qadın daxil edilib. Alimlər iştirakçıların yaşını, təhsilini, bədən kütləsi indeksini, zərərli vərdişlərini (siqaret çəkmə), irqi və etnik mənsubiyyətini, o cümlədən nəticələrə təsir edə biləcək digər amilləri nəzərə alıblar.
Müəlliflər vurğulayırlar ki, bu elmi iş sürətli qocalmanın yalnız nikahın olmaması ilə əlaqəli olduğunu tam sübut etmir. Tədqiqat çarpaz xarakter daşıyıb - iştirakçıların qan nümunələri eyni dövrdə qiymətləndirilib. Bu səbəbdən səbəb-nəticə əlaqəsini dəqiq müəyyən etmək mümkün deyil.
Alimlər ehtimal edirlər ki, burada sosial dəstək, stres və həyat tərzi xüsusiyyətləri rol oynaya bilər, lakin bu fərziyyələri təsdiqləmək üçün əlavə araşdırmalara ehtiyac var. Müəlliflərin fikrincə, işin ən gözlənilməz tapıntısı ailə vəziyyəti ilə epigenetik qocalma arasındakı əlaqənin məhz heç vaxt evlənməyən kişilərdə daha qabarıq şəkildə özünü göstərməsidir.
