Türkiyəli biznesmenin xatirələri: "Heydər Əliyev bizim üçün məmləkətimizin ünvanı idi"

Bu gün ulu öndər Heydər Əliyevin doğum günüdür.

Biz indi Heydər Əliyevi təkcə onun həyatına və siyasi fəaliyyətinə dair yazılan kitablarda axtarmırıq. Məsələn, işğaldan azad olunmuş Şuşada axtarırıq, Kəlbəcərdə axtarırıq. Azad Kəlbəcərin azad "İsti su"yunda Heydər Əliyevin nəfəsi var. Biz indi Heydər Əliyevi Şuşanın qayalarına dırmaşan əsgərlərimizin qətiyyətində də axtarırıq.

Heydər Əliyev deyirdi ki, "Biz Laçının bulaqları olmadan yaşaya bilmərik. Biz o torpaqlara yenidən qayıdacağıq".

Biz indi Heydər Əliyevin dediyi, işğaldan azad edilən Laçında yaşayırıq, Ağdamda, Xocalıda yaşayırıq.

44 günlük Zəfər yolunun hər saatında, hər günündə Heydər Əliyev var idi. Heydər Əliyev indi də var və hər zaman var olacaq - "Azərbaycanın müstəqilliyi əbədidir, dönməzdir!" şüarının timsalında.

Biz Heydər Əliyevi indi onun dostlarının xatirələrində də axtarırıq və Oxu.Az Heydər Əliyevi türkiyəli tanınmış iş adamı Ali Polatdan soraqladı.

Müsahibəyə başlamazdan əvvəl oxuculara Ali Polat barəsində qısa məlumatı təqdim edirik:

1944-cü ildə Təbrizdə anadan olan Ali Polat orta təhsilini Təbrizdə alıb. Ərzurum Kənd Təsərrüfatı İnstitutunun Əkinçilik və iqtisadiyyat fakültəsini ali mühəndislik ixtisası üzrə bitirib.

2004-cü ildə Azərbaycan Beynəlxalq Universitetinin "fəxri professoru", 2009-cu ildə Azərbaycan Kooperasiya Universitetinin "fəxri doktoru" adına layiq görülüb. Türkiyə və Azərbaycan Yazıçılar birliklərinin fəxri üzvüdür.

Ali Polat 1982-ci ilə qədər ət və ət məhsulları ixracatı yolu ilə Şərqi Anadolu bölgəsinin inkişaf etməsində aktiv rol oynayıb. 1983-91-ci illərdə o, Türkiyədə turizmin inkişafını gücləndirən qabaqcıl firmalardan birinin ortağı olaraq Antalya, Fethiye və Kappadokiyada üç istirahət mərkəzi və bir hotel inşa edib.

Sovet İttifaqı dağıldıqdan sonra Azərbaycanın müstəqilliyini əldə etdiyi 1991-ci ildə Azərbaycana iqtisadi kapital qoyan ilk iş adamlarından biri olub. Çox keçmir ki, bacarıqlı iş adamı Əli bəy 1986-cı ildə "Xəzər" şirkətini yaradır.

Ali Polat TİSİAD-ın (Türkiyə-İran Sənayeçiləri və İş adamları Dərnəyi) təşkilatçılarından biri və ömrünün sonuna qədər bu dərnəyin fəxri sədridir.

- Ali bəy, ümummilli lider Heydər Əliyevi necə xatırlayırsınız?

- Gənc yaşlarımda biz harasa gedəndə soruşardılar ki, haralısan? Deyərdik ki, azərbaycanlıyıq. Azərbaycanlıyıq deyəndə Azərbaycanı tanımazdılar. Sonra deyərdik ki, bir azərbaycanlı var, Sovet İttifaqını idarə edən beş nəfərdən biridir. Kimliyini soruşanda: "Heydər Əliyevi tanıyırsınızmı? Əlbəttə, tanıyırıq", - deyərdilər. Heydər Əliyev bizim üçün məmləkətimizin ünvanı idi.

Biz azərbaycanlılar hansı məclis olur-olsun, ilk badəni Heydər Əliyevin şərəfinə qaldırardıq. Çünki bizi dünyaya tanıdan bir tək o var idi.

- Heydər Əliyevlə ilk görüşünüz yadınızdadırmı?

- Prezident Heydər Əliyev Naxçıvana gələndə mən çox cəhd etsəm də, onu gedib görə bilmədim. Zəng etdim, onunla bir xeyli söhbətləşdik. Biz həmsöhbət olduqdan bir müddət sonra Heydər Əliyev Naxçıvana kömək üçün Türkiyəyə müraciət etdi.

Mən Heydər Əliyevlə 1992-93-cü illərdə görüşə bildim. Bu görüşlərdə biz milli məsələlər haqqında danışırdıq.

Yaxşı xatırlayıram, onunla ilk dəfə görüşəndə əlim-ayağım titrəyirdi. Çox böyük insan idi. Heydər Əliyev təkcə Azərbaycanı yox, dünyanı idarə edirdi.

- Məclislərin birində Heydər Əliyev sizdən tamadalıq etmənizi istəmişdi...

- Bəli, Heydər Əliyev məni xüsusi bir axşam yeməyinə dəvət etmişdi. On nəfərdən artıq deyildik. Nə oldu, necə oldu - yaxşı xatırlamıram. Heydər Əliyev qəfil üzünü mənə çevirib dedi ki, "Ali Polat, sən bu gün tamadasan!"

Mən də bu təklifi məmnuniyyətlə qəbul edib, ayağa qalxıb dedim ki, söz verilir cənab Heydər Əliyevə. Ulu öndər qəhqəhə çəkdi. Hamımızı gülmək tutdu.

Sonra mən bir neçə dəfə Süleyman Dəmirəllə birlikdə Heydər Əliyev cənabları ilə görüşdük. Bir dəfə də Məsut Yılmaz Bakıya getmişdi. Mən də onunla birlikdə idim və Heydər Əliyevlə görüşmüşdük. Çox görüşlərimiz olub.

Mənim bir arzum vardı. Bunu rəhmətliyin özünə də demişdim. Demişdim ki, gələcək türk dünyasının lideri siz olmalısınız.

Biz bir neçə dəfə Heydər Əliyevlə nahar etmişik. Çox sadə insan idi. O qədər səmimi, gözəl söhbətlərimiz olurdu ki, həmin söhbətlərin həsrətini indi də çəkirəm.

- Mən sizin Taksimdəki ofisinizdə Heydər Əliyevlə olan şəkillərinizi görmüşəm. O şəkillərin tarixi barəsində danışmağınızı istərdik...

- On yaşımdan ticarətlə məşğulam, ticarəti çox yaxşı bilirəm. Bir dəfə Süleyman Dəmirəllə Bakıya getmişdim. Mən Bakıda bir layihə düşünürdüm. Sovet İttifaqı yeni dağılmışdı. İranda iqtisadiyyat inkişaf etməmişdi. İranın qanunları da buna imkan vermirdi. Türkiyədə də vəziyyət ürəkaçan deyildi. Hesablamalarıma görə, Azərbaycana yaxın çevrədə təxminən üç yüz milyon insan yaşayırdı. Düşünürdüm ki, biz Bakını Dubay kimi ticarət üçün sərbəst bölgə edə bilərik. Böyük iş adamları gəlib Bakıda öz işlərini qura bilsələr, Azərbaycan iş mərkəzinə çevriləcək. Biz iş adamları isə milyarderlər olacaqdıq.

Mən o şəkillərin birində Heydər Əliyevə bunu təklif etdim. Şəklə diqqətlə baxsanız, görəcəksiniz ki, mən bu həmin ideyanın layihəsini Heydər Əliyevə göstərirdim. Həmin gün Süleyman Dəmirəl də Heydər Əliyevə dedi ki: "Heydər qardaş, Ali Polat doğru deyir. Biz belə sərbəst bölgədən ildə bir milyard dollar qazanırıq. Siz də belə etsəniz, yaxşı olar".

- Qarabağ işğaldan azad edildi. Prezident İlham Əliyev atasının arzusunu həyata keçirmiş oldu. Bu barədə nə düşünürsünüz?

- Müzəffər Ali Baş Komandan Prezident İlham Əliyevin Qarabağ problemini həll etməsi onun nüfuzunu daha da artırdı. Mən əminliklə deyə bilərəm ki, dünyanın harasında olur-olsun, bütün azərbaycanlılar onu çox sevirlər.

Prezident İlham Əliyev həm müdrikliyi ilə, həm çox nadir rastlaşa biləcəyimiz siyasi istedadı ilə, həm də sərkərdəlik bacarıqları ilə yüzillik Qarabağ problemini 44 gündə kökündən həll etdi. Allah ondan razı olsun!

- Ulu öndər Heydər Əliyev indi həyatda olsaydı, ona nə demək istəyərdiniz?

- Mənə görə, Heydər Əliyev hələ də yaşayır. Azərbaycanın bu günü Heydər Əliyevin varlığını sübut edir.

Bunu xüsusilə qeyd etmək istəyirəm ki, İlham Əliyev mütləq və mütləq türk dünyasının lideri olmalıdır. Bu fitri istedad ona atasından keçib. Günümüzdə buna qadir ən yaxşı siyasətçi odur. İlham Əliyevdə atasının sadəliyi, qətiyyəti, səmimiyyəti var. Azərbaycan xalqı xoşbəxtdir ki, İlham Əliyev kimi bir liderə sahibdir. İlham Əliyev dahi siyasətçi Heydər Əliyevin oğludur.

Elçin Aslangil