Gökhan Özendən Los-Ancelesdəki fəlakətlə bağlı paylaşım: "Burada yanğın yoxdur, gördüyünüzə inanın"

Uzun illərdir ABŞ-nin Los-Anceles şəhərində yaşayan Türkiyənin məşhur müğənnisi Gökhan Özen evindən etdiyi paylaşımla yenidən gündəmə gəlib.

Oxu.Az-ın verdiyi məlumata görə, o, sosial mediada paylaşılanların əksinə olaraq, yanğınla bağlı panik ab-havanın olmadığını deyib.

Bu dəfə Gökhan Özen yenidən evinin terrasına çıxaraq ətrafı göstərib.

"Burada yanğın yoxdur. Gördüyünüzə inanın, eşitdiyinizə yox", - deyə o bildirib.

İfaçı vurğulayıb ki, təpələri ilə məşhur olan İstanbuldan fərqli olaraq Los-Anceles düz bir şəhərdir və şəhərin bir başında durmaqla okeana qədər məsafəni rahatlıqla görmək olar.

"Əlbəttə, Los-Ancelesdə bir-iki yerdə meşə yanğınları olub, amma göstərildiyi kimi deyildi, ayın 13-dən bəri isə vəziyyət kadrlarda göründüyü kimidir", - deyə o vurğulayıb.

Gökhan hazırda videoda görünənlərə inanmağa çağırıb:

"Xəbər kirliliyi var. Videoların üstünə tarix qoyulmur, ona görə də insanlar bunu yeni video sanırlar. Mənim özümün qarşısına da belələri çıxır. Süni intellektlə hazırlananlar da az deyil".

Sonra yenidən şəhər mənzərəsini göstərərək deyir:

"Baxın. Buralar yanan ərazi kimi görünürmü? Əlbəttə, təpələrin arxasında bir-iki xırda yanğın oldu. Amma güclü yanğında buralar belə görünərdimi?"

Gökhan Özendən Los-Ancelesdəki fəlakətlə bağlı paylaşım: "Burada yanğın yoxdur, gördüyünüzə inanın"

"Mən sadəcə olanları tarixi ilə sənəd şəklində təqdim elədim. Amma hər kəs istədiyinə inanmaqda azaddır", - deyə o sözlərini yekunlaşdırıb.

Gökhan Özanın bu paylaşımı da sosial mediada gündəm olub.

Qeyd edək ki, məşhur müğənni bundan əvvəl də analoji görüntülər paylaşaraq şəhərdə sakit mühiti və yanğınsöndürən təyyarələrin görünmədiyini izləyiciləri ilə bölüşüb. Həmin paylaşım qısa müddətdə ciddi tənqidlərə səbəb olub.

Xatırladaq ki, meşə yanğınları yanvarın 7-də cənubi Kaliforniyada başlayıb. ABŞ Prezidenti Co Bayden ştatda fövqəladə vəziyyət rejimi elan edib. Los-Ancelesdə Hollivud yaxınlığındakı rayonların sakinlərinin təxliyəsi barədə əmr verilib. Son məlumatlara görə, yanğınlar nəticəsində 25 nəfər həlak olub.