Sentyabrın 29-da qadın voleybolçular arasında Avropa çempionatının dörddəbir final mərhələsində Almaniya yığması üzərində inamlı qələbə qazanan Azərbaycan milli komandası yarımfinala yüksəlib.
Oxu.Az-ın məlumatına görə, Milli Gimnastika Arenasında keçirilən qarşılaşmada qadın voleybolçularımız 3:0 hesabı ilə qələbə qazanıblar.
Azərbaycan Prezidenti İlham Əliyev və birinci xanım Mehriban Əliyeva Azərbaycan və Almaniya voleybolçularının oyununa baxıblar.
Milli komandamız birinci setin əvvəlində hesabda geri olmasına baxmayaraq, yüksək əzmkarlıq nümayiş etdirərək qalib gəlib - 25:20. Görüşün ikinci setində Azərbaycan yığması əldə etdiyi üstünlüyü sona qədər qoruyub saxlayaraq, böyük fərqlə qələbə qazanıb - 25:18. Qarşılaşmanın üçüncü seti də inamlı oyun nümayiş etdirən voleybolçularımızın qələbəsi ilə başa çatıb – 25:21.
Beləliklə, dörddəbir finalda Almaniya millisini 3:0 hesabı ilə məğlubiyyətə uğradan Azərbaycan komandası Avropa çempionatının yarımfinalına vəsiqə qazanıb.
Prezident İlham Əliyev və birinci xanım Mehriban Əliyeva milli komandamızın qələbəsini alqışlayıblar.
Azərbaycan voleybolçuları yarımfinalda Niderland millisi ilə mübarizə aparacaqlar.
19:11
Bakıda Milli Gimnastika Arenasında qadın voleybolçular arasında Avropa çempionatının 1/4 final mərhələsinin sonuncu günündə Azərbaycan-Almaniya görüşünə start verilib.
Oxu.Az-ın xəbərinə görə, dövlət başçısı İlham Əliyev və birinci xanım Mehriban Əliyeva milli komandamızın oyununu canlı izləyirlər.
Yarımfinalın sonuncu iştirakçısı saat 20:30-da Rusiya və Türkiyə voleybolçuları arasında qarşılaşmadan sonra müəyyənləşəcək.
S.B.
www.oxu.az
