"Slovakiya Azərbaycanın pilotsuz uçuş aparatları (PUA) sahəsindəki təcrübəsini öyrənməkdə maraqlıdır".
Oxu.Az xəbər verir ki, bu barədə "Report"a müsahibəsində Slovakiyanın baş nazirinin müavini və müdafiə naziri Robert Kalinyak bildirib.
"Azərbaycan PUA sahəsindəki inkişaf etmiş texnologiyaları ilə yaxşı tanınır. Biz bu sahədə əməkdaşlıqda çox maraqlıyıq. Biz sizin təcrübənizdən də yararlanmaq istəyirik", - Kalinyak deyib.
O vurğulayıb ki, Slovakiya tərəfi artıq Azərbaycan məhsullarının qiymətləndirilməsini aparıb və bu məhsullar irəli sürülən tələblərə tam cavab verir.
"Biz artıq əmin olduq ki, sizin məhsullarınız çox yaxşıdır və bizim tələblərimizə cavab verir", - R.Kalinyak vurğulayıb.
Bundan əlavə, o, gələcək qarşılıqlı fəaliyyətin perspektivlərini müzakirə etmək üçün Azərbaycanın müdafiə sənayesi naziri Vüqar Mustafayevlə danışıqlar aparmaq planları barədə bildirib.
"Sabaha sizin müdafiə sənayesi nazirinizlə görüşüm planlaşdırılıb. Biz bir-birimizi çox yaxşı tanıyırıq, buna görə də bu əməkdaşlığın gələcək inkişafını müzakirə etmək üçün görüşümüzü səbirsizliklə gözləyirəm", - o əlavə edib.
R.Kalinyak həmçinin müdafiə sahəsində ikitərəfli qarşılıqlı fəaliyyətin haubitsalar və minaatanlar xətti üzrə artıq fəal şəkildə irəlilədiyinə diqqət çəkib. O qeyd edib ki, Azərbaycan Slovakiya istehsalı olan haubitsalar əldə edib və bu əməkdaşlıq istiqaməti davam etdiriləcək.
