"Dünyanın heç bir regionunda separatçılığın təşviqinə və ya onu dəstəkləyən şəxslərin fəaliyyətinə haqq qazandırılması beynəlxalq hüququn prinsiplərinə uyğun hesab edilmir".
Bu fikirləri Oxu.Az-a açıqlamasında Milli Məclisin deputatı Azər Badamov deyib.
O bildirib ki, bir çox dövlətlər ərazilərində separatizm meyilləri yarandıqda qanunvericilik çərçivəsində qəti tədbirlər görür, ölkənin ərazi bütövlüyünü və konstitusiya quruluşunu qorumaq istiqamətində hüquqi mexanizmləri işə salırlar:
"Bu baxımdan, Azərbaycanın suveren ərazisi olan Qarabağa fərqli yanaşmanın tətbiqi hüquqi və siyasi baxımdan qəbul oluna bilməz. Hər bir dövlətin ərazi bütövlüyünün və suverenliyinin qorunması onun daxili işidir və kənar qüvvələrin separatçılığı dəstəkləməsi beynəlxalq münasibətlərdə əlavə gərginlik yaradır. Azərbaycan 2020-ci ildə 44 günlük Vətən müharibəsi nəticəsində ərazi bütövlüyünü bərpa etdi. 2023-cü il sentyabrın 19-20-də həyata keçirilmiş lokal antiterror tədbirlərindən sonra isə ölkənin bütün ərazisində dövlət suverenliyi tam təmin olundu. Bundan sonra ərazilərimizdə qanunsuz silahlı və separatçı strukturların fəaliyyətinə son qoyuldu, həmin fəaliyyətlə əlaqəli şəxslər Azərbaycan qanunvericiliyi çərçivəsində istintaqa cəlb olundular və məhkəmə qarşısına çıxarıldılar".
Deputatın sözlərinə görə, Ruben Vardanyan da separatçıların digər rəhbərləri kimi Qarabağda qanunsuz fəaliyyət göstərməkdə və digər cinayət əməllərində ittiham olunaraq mühakimə edilib:
"Belə ki, Azərbaycanın qanunlarını pozaraq ölkənin suveren ərazilərində separatçı fəaliyyəti dəstəkləyən şəxslərin məsuliyyətə cəlb edilməsi dövlətin hüquq-mühafizə və məhkəmə səlahiyyətlərinin həyata keçirilməsinin tərkib hissəsidir. Bu kontekstdə Ruben Vardanyanın yalnız "humanitar fiqur" kimi təqdim olunması hadisələrin hüquqi və siyasi tərəflərini kölgədə qoyur, bu isə beynəlxalq hüququn tətbiqi baxımından mübahisələr doğurur.
Bu baxımdan, Qarabağda separatçılığı dəstəkləyən şəxslərə siyasi və ya humanitar don geyindirilməsi gələcəkdə oxşar hallarla bağlı təhlükəli presedent yarada bilər. Həm də suveren dövlətin qanunları əsasında qəbul edilən məhkəmə qərarlarının siyasi motivlərlə şübhə altına alınmasını dövlətlərin ərazi bütövlüyü və suverenliyi prinsiplərinə hörmətsizlik, ikili standartlı yanaşma hesab edirəm".
