Azərbaycanda mövcud su mənbələri araşdırılır

Azərbaycanın mövcud su mənbələrinin dəyərləndirilməsi istiqamətində “Azərsu” ASC-nin mütəxəssisləri tərəfindən araşdırmalar həyata keçirilir. 

Bu barədə Oxu.Az-a açıqlamasında “Azərsu” ASC-nin mətbuat xidmətinin rəhbəri Anar Cəbrayıllı məlumat verib. 

O bildirib ki, “Su ehtiyatlarından səmərəli istifadənin təmin edilməsinə dair 2020–2022-ci illər üçün Tədbirlər Planı”na əsasən, bəzi mənbələrin məhsuldarlığının artırılması nəzərdə tutulur:

“Oğuz-Qəbələ-Bakı su kəmərinin, eləcə də İkinci Bakı su kəmərinin mənbəyində əlavə su həcmlərinin yaradılması ilə bağlı mütəxəssislərimiz tərəfindən ilkin mərhələdə hansı tədbirlərin görülməli olduğu barədə araşdırma aparılır. Mövcud su mənbələrinin məhsuldarlığının artırılması məqsədilə subartezian və artezian quyularının qazılması nəzərdə tutulur”. 

A.Cəbrayıllı onu da əlavə edib ki, ölkədə su ehtiyatlarından səmərəli istifadənin təmin edilməsi məqsədi ilə üçüncü Şollar su kəmərinin mənbəyində də araşdırmalar davam etdirilir: 

“Araşdırmaların aparılması və texniki əsaslandırma sənədlərinin hazırlanması məqsədilə Sukanal Elmi Tədqiqat Layihə institutunun mütəxəssisləri artıq işlərə başlayıblar. Bu sənədlər yekunlaşandan sonra mənbədə hansı işlərin görülməsi bəlli olacaq”.

Könül Cəfərli