Messinin nümayiş etdirib poza verdiyi kubokun saxta olduğu ortaya çıxdı - FOTO

Messinin nümayiş etdirib poza verdiyi kubokun saxta olduğu ortaya çıxıb.

Məlumata görə, həmin vaxt meydanda iki kubok olub: əsl və saxta. İkinci kubok dünya çempionatına altı ay qalmış argentinalı azarkeşlər tərəfindən milli komandanın bütün oyunçularının onun üzərində avtoqraf qoyması üçün hazırlanıb.

Ancaq təntənəli mərasimdə saxta kubok anlaşılmaz bir şəkildə Lionel Messinin əlinə keçib və o, fotoqrafların qarşısında onunla poza verməyə başlayıb. İkinci kubok əslindən görünüşünə və çəkisinə görə fərqlənmədiyindən Messi bunun FIFA prezidenti Canni İnfantino tərəfindən ona verilən kubok olmadığını başa düşməyib.

Səhv barədə Messini komanda yoldaşı, yarımmüdafiəçi Anxel Di Mariya məlumatlandırıb (ona da təhlükəsizlik xidmətinin əməkdaşları məlumat veriblər - red.).

Qeyd edək ki, Messinin saxta kubokla fotosu özünün “Instagram” səhifəsində, demək olar ki, 75 milyon bəyənmə toplayıb. Görüntü sosial şəbəkədə idmançılar arasında bəyənmə sayına görə rekord qırıb.

Xatırladaq ki, Qətərdə keçirilən 2022-ci il futbol üzrə dünya çempionatının final oyunu başa çatdıqdan sonra kubokla bağlı daha bir hadisə yaşanmışdı. Türkiyəli aşpaz Nusret Gökçe meydanda futbolçuların qarşısına çıxıb, kuboka toxunub və bir neçə dəfə Argentina millisinin kapitanı Lionel Messini onunla şəkil çəkdirməyə razı salmağa çalışıb. Qaydalara görə, kuboku yalnız dünya çempionları və dövlət başçıları tuta bilərlər.

Mənbə: Clarin