Baku TV-nin "Kəndinə qayıt" verilişinin növbəti buraxılışında Goranboy rayonunun Səfikürd kəndinə səfər edilib.
Rayon mərkəzindən təxminən 7 kilometr məsafədə yerləşən Səfikürd qədim tarixi, zəngin təbiəti və adət-ənənələrini yaşadan sakinləri ilə diqqət çəkir.
Verilişdə kənd sakinlərinin yaratdığı "Doğma kəndimiz" adlı "WhatsApp" qrupundan da bəhs olunub. Bildirilib ki, 300-dən çox üzvü olan qrup vasitəsilə kəndin abadlaşdırılması məqsədilə mütəmadi iməciliklər təşkil edilir.
Sakinlər hər həftəsonu bir araya gələrək yolları və ətraf əraziləri təmizləyir, Şəhidlər xiyabanındakı ağaclara və güllərə qulluq edirlər.
"Qrupun öz nizamnaməsi var. Əsas məqsəd kəndin abadlaşdırılmasıdır. Ayda dörd dəfə - şənbə və ya bazar günləri iməcilik təşkil edirik", - deyə kənd sakinlərindən biri bildirib.
Səfikürd sakinləri kəndin qədim adət-ənənələrini də yaşadırlar. Tut mövsümündə qadınlar bir araya gələrək bəkməz hazırlayır, təndir çörəyi bişirirlər.
Kənd sakini Telli xala bəkməzin hazırlanma qaydasından danışaraq bildirib ki, onun tərkibinə heç bir əlavə məhsul qatılmır.
Verilişdə 90 yaşına yaxın Gülnaz nənə ilə də həmsöhbət olunub. Doqquz övlad böyüdən kənd sakini müasir dövrdə bəzi valideynlərin uşaq böyütməyin çətinliyindən şikayət etmələrinə münasibət bildirib.
"Bir uşağa baxmaq çətin deyil. Özlərinə zəhmət vermirlər. Mən doqquz uşaq böyütmüşəm. Onlar bir-birinə dayaq ola-ola böyüyüblər. İndi də hamısı mehribandır", - deyə Gülnaz nənə bildirib.
