Abşeron rayonunun Məmmədli kəndində məişət tullantılarının yol kənarında qalaqlanması sakinlərin narazılığına səbəb olub.
Bu barədə şikayət Oxu.Az-ın qaynar xəttinə daxil olub.
Qeyd olunub ki, əvvəllər ərazidə üç zibil konteyneri olsa da, bilinməyən səbəbdən onları götürüblər.
"Zibil qabları olmadığı üçün camaat tullantıları yol kənarına atır. Nəticədə antisanitar vəziyyət yaranır və kəskin qoxu səbəbindən ərazidən keçmək mümkün olmur", - deyə şikayətdə bildirilir.
Məsələ ilə bağlı aidiyyəti üzrə sorğu verilib.
Oxu.Az-a açıqlamasında Abşeron Rayon İcra Hakimiyyətinin (RIH) Mətbuat Xidmətinin rəhbəri Seymur Qasımbəyli bildirib ki, ərazi əvvəllər qonşu rayon tərəfindən təmizlənib.
"Abşeron Rayon İcra Hakimiyyətinə məlumat verilmədən ərazinin onlar tərəfindən təmizlənməsindən imtina olunub. Hazırda aparılan danışıqlarla ərazinin təmizlənərək təhvil verilməsi istiqamətində razılıq əldə olunub. Ərazi təhvil alındıqdan sonra tərəfimizdən sözügedən ünvana konteynerlər qurulacaq və bundan sonra ərazinin təmizliyi tam təmin olunacaq, o cümlədən məişət tullantıları əvvəlcədən müəyyən edilmiş qrafikə uyğun olaraq daşınacaq", - deyə S.Qasımbəyli vurğulayıb.
