İyulun 14-də saat 14:00-da Şəki Rayon Mərkəzi Xəstəxanasının Təcili və təxirəsalınmaz tibbi yardım şöbəsinə yol-nəqliyyat hadisəsi nəticəsində iki nəfər (kişi cinsli) hospitalizasiya olunub.
Bu barədə Oxu.Az-ın sorğusuna cavab olaraq Tibbi Ərazi Bölmələrini İdarəetmə Birliyindən (TƏBİB) məlumat verilib. Bildirilib ki, hər iki şəxsə ilkin tibbi yardım göstərilib, hazırda müalicələri Təcili və təxirəsalınmaz tibbi yardım şöbəsində davam etdirilir.
"Hospitalizasiya olunan şəxslərin vəziyyəti stabil olaraq qiymətləndirilir. Bir nəfərin isə (kişi cinsli) həkiməqədər ölüm faktı qeydə alınıb", - deyə məlumatda qeyd edilib.
Bu gün Şəki rayonunun Çeşməli kəndi ərazisində ağır yol-nəqliyyat hadisəsi qeydə alınıb.
Oxu.Az xəbər verir ki, Balakən rayon sakini, 1952-ci il təvəllüdlü Yusif Muradovun idarə etdiyi "Lada Priora" markalı minik avtomobili idarəetməni itirib və nəqliyyat vasitəsi yolun kənarındakı kolluğa düşüb.
Qəza nəticəsində sürücü hadisə yerində vəfat edib. Onun meyiti Fövqəladə Hallar Nazirliyinin Şəki rayon Dövlət Yanğından Mühafizə Hissəsinin xilasediciləri tərəfindən avtomobildən çıxarılaraq təcili tibbi yardım əməkdaşlarına təhvil verilib.
İlkin ehtimala görə, Yusif Muradovun sükan arxasında ürək çatışmazlığından həyatını itirdiyi bildirilir.
Avtomobildə olan sərnişin, mərhumun 81 yaşlı qardaşı Ziyafəddin Muradov isə xəsarət alıb və Şəki Rayon Mərkəzi Xəstəxanasına çatdırılıb.
Faktla bağlı araşdırma aparılır.
