Şərur rayonunun Muğancıq Mehrab kənd tam orta məktəbinin keçmiş direktorunun işə qayıdacağı ilə bağlı məlumat bəzi müəllimlərin narazılığına səbəb olub.
Oxu.Az xəbər verir ki, bununla bağlı video sosial şəbəkədə yayımlanıb.
Şikayət edən müəllimlər iddia ediblər ki, keçmiş direktorun adı şagirdlərə qarşı psixoloji təzyiqdə, rüşvət və digər əməllərdə hallanır.
Naxçıvan Muxtar Respublikasının Təhsil Nazirliyindən Oxu.Az-ın sorğusuna cavab olaraq məsələdən xəbərdar olduqları bildirilib.
Qeyd olunub ki, Muğancıq Mehrab kənd tam orta məktəbinin keçmiş direktoru Sinduz Şəmsəddin qızı Cəfərovanın işə qayıtmaması ilə bağlı müəllimlərin etiraz videosunun araşdırılması ilə bağlı Naxçıvan Muxtar Respublikası Təhsil Nazirliyi tərəfindən müvafiq komissiya yaradılıb və hazırda komissiya tərəfindən məsələ ilə bağlı araşdırma aparılır.
"Araşdırma müddəti bitdikdən sonra Naxçıvan Muxtar Respublikası Təhsil Nazirliyi tərəfindən qanunvericiliyə uyğun olaraq tədbirlər görüləcək və ictimaiyyətə məlumat veriləcək", - deyə məlumatda bildirilir.
Əzizə İsmayılova
