ABŞ-də Nyu-Meksiko ştatından olan 26 yaşlı Şon Barton adlı gənc sörfçünü köpəkbalığı dişləyib və ayağından ciddi xəsarət alıb.
Oxu.Az-ın xəbərinə görə, bu barədə "WECT 6 News" məlumat verib.
O, Şimali Karolina ştatının Sunset-Biç şəhəri yaxınlığında çimərlikdə sörfinqlə məşğul olduğu zaman ayağında kəskin ağrı hiss edib.
"Elə möhtəşəm bir dalğanı tutmuşdum ki, birdən nəsə güclü şəkildə ayağımı sıxdı", - deyə Şon Barton bildirib.
Sörfçünün ailəsi hadisədən dərhal sonra yaxınlıqdakı köpəkbalığını görüb. O, sahilə çıxa bilib, xilasedicilər ona ilkin tibbi yardım göstərib və daha sonra xəstəxanaya yerləşdirilib.
Bartona 11 tikiş qoymaq lazım olub. Həkimlər təsdiqləyiblər ki, çox güman, ona köpəkbalığı hücum edib. Zədəsinə baxmayaraq, sörfçü qeyd edib ki, yenə də suya qayıdacaq, lakin indi daha diqqətli olacaq.
Yerli hakimiyyət orqanları köpəkbalıqlarının bu suların təbii sakinləri olduğunu xatırladaraq, istirahət edənləri ayıq-sayıq olmağa çağırıb.
