ABŞ hərbçiləri Atlantik okeanında Rusiyaya məxsus "Marinera" tankerini ələ keçiriblər.
Oxu.Az xəbər verir ki, bu barədə "Readovka" "Telegram" kanalı xəbər yayıb.
Məlumata əsasən, ABŞ Silahlı Qüvvələrinin Avropa Komandanlığı tanker gəmisinin və onun ekipajının saxlanıldığını rəsmi şəkildə təsdiqləyib.
Bildirilir ki, iki həftədən artıq davam edən təqibdən sonra ABŞ-nin xüsusi təyinatlı qüvvələri Atlantik okeanında Rusiyaya məxsus "Marinera" tankerinin göyərtəsinə eniblər.
"Fox News" jurnalisti Lukas Tomlinsonun verdiyi məlumata görə, əməliyyat ABŞ sahillərindən təxminən 4 000 kilometr məsafədə həyata keçirilib.
"Marinera" tankerinin ələ keçirilməsi ilə bağlı indiyədək məlum olan əsas məqamlar bunlardır:
- Əməliyyatda ABŞ-nin patrul və yanacaqdoldurma təyyarəsi, Böyük Britaniyaya məxsus "Boeing" təyyarəsi iştirak edib. Həmçinin ərazidə ABŞ-nin bir neçə "Pilatus U-28A Draco" xüsusi təyinatlı təyyarəsi də olub;
- Tankerin Venesuelaya qarşı tətbiq edilən blokadadan yayınmaq məqsədilə Rusiyanın yurisdiksiyasına daxil edildiyi bildirilir. Ekipaj Soçidə qeydiyyatdan keçib, gəminin adı dəyişdirilib və Rusiya bayrağı qaldırılıb;
ABŞ Silahlı Qüvvələrinin Avropa Komandanlığı tankerin ABŞ sanksiyalarını pozduğu üçün saxlanıldığını açıqlayıb.
ABŞ Sahil Mühafizəsi Latın Amerikası sahillərində Rusiyanın "Marinera" neft tankerinin saxlanılması üzrə əməliyyat həyata keçirir.
Oxu.Az-ın xəbərinə görə, bu barədə "Reuters" nəşri mənbələrə istinadən məlumat verib.
Məlumata görə, əməliyyat tankerin Atlantik okeanında iki həftəlik təqibindən sonra başlayıb. Bu, son saatlarda gəminin saxlanılması üçün edilən ikinci cəhddir və əməliyyata ABŞ Silahlı Qüvvələri cəlb edilib.
Rusiya KİV-in məlumatına görə, ABŞ Sahil Mühafizəsi tərəfindən izlənilən gəminin göyərtəsinə ABŞ hərbçilərinin desantı enməyə çalışır.
"ABŞ gəmiləri iki həftədən çoxdur ki, "Rusiya bayrağı" ilə üzən tankeri təqib edir və ona basqın etməyə hazırlaşır".
Oxu.Az-ın xəbərinə görə, bu barədə ABŞ-nin "Wall Street Journal" nəşrinin dərc etdiyi materialda bildirilib.
Nəşrin məlumatına görə, Rusiya daha əvvəllər "Bella 1" kimi tanınan "Marinera" tankerini qorumaq üçün Şimali Atlantikaya sualtı qayıq və digər gəmilər göndərib.
Bildirilir ki, dekabrın 21-də Venesuelaya getdiyi ehtimal edilən bu gəmi ABŞ Sahil Mühafizəsinin yoxlamasından yayınmaq üçün Venesuela sahillərindən geri dönüb və tam sürətlə Atlantik okeanına doğru yola düşüb.
ABŞ gəmiləri və aviasiyası tankeri izləyərək ona hücum etməyə hazırlaşıblar, lakin dekabrın 31-də ekipaj elə birbaşa gəminin göyərtəsinə Rusiya bayrağının şəklini çəkib və onun Rusiyanın yurisdiksiyası altında olduğunu bəyan edib. Buna qədər isə ABŞ mənbələrinin məlumatına görə, gəmi ümumiyyətlə bayraqsız üzürmüş.
Belə bir demarş ABŞ-liləri vəziyyət aydınlaşana qədər əməliyyatı dayandırmağa məcbur edib.
Yanvarın 1-də gəmi Soçi limanı qeydiyyatı ilə "Marinera" adı altında Rusiyanın dövlət gəmi reyestrinə daxil edilib.
Daha əvvəl isə "The New York Times" qəzeti yazmışdı ki, gəminin heyəti Rusiya, Ukrayna və Hindistan vətəndaşlarından ibarətdir.
ABŞ iddia edir ki, "Marinera" gəmisi hələ "Bella 1" olduğu vaxtlardan İran neftini Venesuelaya daşıyırdı və bununla da hər iki ölkəyə qarşı çoxsaylı sanksiyaları pozurdu. ABŞ xüsusi xidmət orqanlarının diqqətini isə gəmi hələ 2024-cü ildə çəkmişdi ki, o zaman "Panama" adlanırdı və eyni şəkildə İran neftini daşıyırdı.
KİV ABŞ məmurlarına istinadən yazır ki, tankeri batırmaqdansa, onu ələ keçirməyə üstünlük verilir.
Qeyd edək ki, dekabr ayında oxşar əməliyyat zamanı ABŞ Venesueladakı limandan yola düşən Qayana bayrağı altında üzən tankeri ələ keçirib.
