Danimarkanın Baş naziri Mette Frederiksen üzü örtən müsəlman geyimlərinə qoyulan qadağanı genişləndirmək, təhsil müəssisələrində ibadət otaqlarını qadağan etmək niyyətində olduğunu açıqlayıb.
Oxu.Az xəbər verir ki, bu barədə o, "Ritzau"ya müsahibəsində bildirib.
Danimarkanın baş naziri niqab və çadra qadağasını təhsil müəssisələrinə şamil etmək istəyir. Onun sözlərinə görə, bu geyimlər qızların və qadınların hüquqlarını məhdudlaşdırmaq üçün istifadə edilə bilər.
"İnsanların öz dinlərinə inanmaq və etiqad etmək hüququ var, lakin demokratiya üstünlük təşkil edir. Qızları və qadınları üzlərini tamamilə örtməyə məcbur etməklə onlara qarşı ayrı-seçkilik etmək demokratiya ilə bir araya sığmır", - baş nazir bəyan edib.
Frederiksen deyib ki, təhsil müəssisələrindəki ibadət otaqları "sosial nəzarət və ayrı-seçkilik praktikasının bir formasıdır".
O, milli səviyyədə namaz otaqlarını qadağan etmək istəmədiyini, əksinə hökumətə universitetlərlə əlaqə saxlamağı və onların özlərinin qərar verməyi tapşıracağını söyləyib.
"Mən Danimarkanın baş naziriyəm. Mən də qadınam. Və qadınlara qarşı ayrı-seçkiliyə dözmürəm", - Danimarkanın baş naziri vurğulayıb.
