Beynəlxalq Atom Enerjisi Agentliyi (MAQATE) Çernobıl Atom Elektrik Stansiyasında (AES) partlayışın baş verdiyini təsdiqləyib.
Oxu.Az xəbər verir ki, bu barədə Rusiya KİV-i məlumat yayıb.
Məlumatda qeyd olunur ki, fevralın 14-də yerli vaxtla 1:50 radələrində MAQATE-nin Çernobıldakı əməkdaşları dağılmış enerji blokunun üstündəki sarkofaqdan partlayış səsini eşitdiklərini və bunun yanğına səbəb olduğunu müşahidə ediblər.
Volodimir Zelenski Rusiya ordusuna məxsus pilotsuz uçuş aparatının (PUA) Çernobıl Atom Elektrik Stansiyasının qoruyucu sarkofaqını vurduğunu açıqlayıb.
V. Zelenski bu barədə öz "Telegram" kanalında yazıb.
Ukrayna prezidenti qeyd edib ki, yüksək partlayıcı döyüş başlığına malik pilotsuz təyyarə Çernobıl Atom Elektrik Stansiyasının dağıdılmış dördüncü enerji blokunun üstündəki izolyasiya konstruksiyasını vurub.
Ukrayna prezidenti həmçinin zərbə anını və pilotsuz təyyarənin zərbəsinin nəticələrini əks etdirən videonu paylaşıb.
V.Zelenski bildirib ki, zərbə nəticəsində sığınacaq xeyli ziyan görüb.
O əlavə edib ki, PUA hücumu nəticəsində meydana gələn yanğın söndürülüb.
"Hazırda radiasiya səviyyəsi norma həddini keçmir" - V.Zelenski vurğulayıb.
Öz növbəsində MAQATE-nin baş direktoru Rafael Qrossi bildirib ki, atom elektrik stansiyada baş verən insident nüvə təhlükəsizliyi sahəsində risklərin qaldığını bir daha sübut edir.
