Türkiyənin məşhur sosial media fenomeni Dilan Polatın və onunla bərabər ittiham edilən həyat yoldaşı Engin Polatın məhkəmə prosesi davam edir.
Oxu.Az bu barədə CNN-ə istinadən xəbər verib.
Qeyd olunur ki, bu gün səhər saatlarında Ankara şəhərində Engin Polatın növbəti məhkəmə prosesi baş tutub. O, məhkəmənin keçirildiyi ünvana gəlib, ancaq Dilan Polat prosesdə iştirak etməyib. Xatırladaq ki, hazırda cütlüyün münasibətləri hamar getmir, onların boşanacağı gözlənilir.
Türkiyədə keçirilən əməliyyatlar çərçivəsində ötən il noyabrın 1-də məşhur sosial media fenomeni Dilan Polat və həyat yoldaşı Engin Polat, həmçinin Dilanın bacısı Sıla Doğu, Enginin qardaşı Kürşat Polat da saxlanılıblar. Onların əmlakları müsadirə olunmaqla yanaşı, avtomobilləri də bəyaz rəngə boyanaraq polis maşınları kimi istifadə olunmağa başlayıb. Cütlük Türkiyədə və bir çox ölkələrdə gözəllik salonları şəbəkəsinə sahibdir, həmçinin kosmetik məhsulların istehsalı ilə məşğul olur. Onların iki övladı var.
Xatırladaq ki, Türkiyədə 2023-cü ilin noyabrından başlayaraq altı şəhərdə keçirilən əməliyyatlarda Dilan Polat və həyat yoldaşı Engin Polatın da aralarında olduğu 24 şübhəli şəxs saxlanılıb. Onlar "Cinayət törətmək məqsədilə təşkilat yaratmaq və idarə etmək", "Cinayət yolu ilə əldə edilmiş əmlak dəyərlərinin yuyulması", "Futbol və digər idman yarışlarında mərc və şans oyunlarının təşkili haqqında qanunun pozulması" maddələri ilə ittiham olunurlar. Prokuror bu cinayətlərə görə, onların 40 il azadlıqdan məhrum edilməsini istəyib. Ancaq avqustun 19-da Dilan Polat azadlığa buraxılıb.
