HƏMAS Qəzza sazişi planına dəyişikliklər etməyə çalışdı - Netanyahunun REAKSİYASI

Fələstinin radikal HƏMAS hərəkatı Qəzza zolağındakı vəziyyətin nizamlanması üçün Ağ Ev tərəfindən dəstəklənən sövdələşmə planına 29 dəyişiklik olunmasını tələb edib, İsrail Baş naziri Benyamin Netanyahu isə bunların hamısını rədd edib.

Oxu.Az-ın məlumatına görə, bu barədə İsrail hökumət başçısının ofisinin müşaviri Dmitri Gendelman TASS-ın müxbirinə bildirib.

"İsrail ABŞ Prezidenti Co Baydenin dəstəklədiyi plandan bir millimetr belə geri çəkilmədi", - deyə o qeyd edib.

Gendelman İsrail tərəfindən heç bir şərtin nə əlavə edilmədiyini, nə də çıxarılmadığını vurğulayıb.

"İsrail HƏMAS tərəfindən də planda heç bir dəyişikliyə yol verməyəcək", - deyə Netanyahu ofisinin müşaviri əlavə edib.

O hesab edir ki, növbəti addım HƏMAS tərəfindən atılmalıdır, onlar ABŞ-nin dəstəklədiyi sövdələşmənin şərtlərini qəbul etməlidirlər.

"Bura İsrailin müharibəni bütün məqsədlərinə çatana qədər davam etdirmək hüququ, Sinay yarımadasından silah qaçaqmalçılığının qarşısının alınması, ilk mərhələdə maksimum sayda sağ girovun qaytarılması və HƏMAS döyüşçülərinin Qəzza zolağının şimal hissələrinə qayıtmasının qarşısının alınması daxildir", - deyə Gendelman sadalayıb.