Birləşmiş Ərəb Əmirliklərində (BƏƏ) yerləşən və Yaxın Şərqin ən böyük dəniz limanı sayılan Cəbəl-Əli şəhəri Hörmüz boğazının blokadaya alınması səbəbindən böhran astanasındadır.
Oxu.Az xəbər verir ki, bu barədə Böyük Britaniyanın "Financial Times" nəşri məlumat yayıb.
Məlumata görə, İran ətrafında münaqişə başladıqdan sonra Dubay iqtisadiyyatının dayaq nöqtəsi hesab edilən bu liman vasitəsilə daşınan yüklərin həcmi 90 faizdən çox azalıb. Nəşr qeyd edir ki, bu hal boğazda gəmiçilik fəaliyyətinin zəifləməsi fonunda baş verir: ABŞ-nin İrana qarşı müharibəsindən əvvəl gündəlik 135 gəmi keçdiyi halda, hazırda bu göstərici orta hesabla 17-yə düşüb.
Cəbəl-Əli azad iqtisadi zona ilə birlikdə Dubayın ümumi daxili məhsulunun (ÜDM) beşdəbirindən çoxunu təmin edir. 2025-ci ildə dövlətə məxsus "DP World" şirkətinin gəlirinin 30 faizi məhz bu limanın payına düşüb. BƏƏ rəhbərliyi Hörmüz boğazından kənarda alternativ yollar axtarışındadır.
"DP World" şirkəti Oman körfəzi sahilində, Füceyrədə iki yeni liman inşa etməyi planlaşdırır. Lakin ekspertlər onların Cəbəl-Əlini əvəz edə biləcəyinə şübhə ilə yanaşırlar.
Yazıda qeyd olunur ki, bu liman təkcə böyük ötürücülük qabiliyyətinə deyil, həm də inkişaf etmiş nəqliyyat infrastrukturuna malikdir.
Rays Universitetinin energetika üzrə eksperti Cim Kreyn sözügedən limanın əhəmiyyəti barədə belə deyib:
"Cəbəl-Əli olmasaydı, bizim tanıdığımız indiki Dubay mövcud olmazdı".
