İran ABŞ və İsrailə ölkənin həlak olmuş ali lideri Əli Xamenei ilə vida mərasimlərinin keçirildiyi günlərdə hücum etməkdən çəkinməklə bağlı xəbərdarlıq ünvanlayıb.
Oxu.Az xəbər verir ki, bu barədə ölkənin dövlət teleradio şirkəti İran Silahlı Qüvvələrinin "Xatəm əl-Ənbiya" Mərkəzi Qərargahının rəisi Əli Abdullahiyə istinadən məlumat yayıb.
İran ordusunun rəsmisi sözügedən ölkələri sərt cavab zərbələri ilə hədələyib:
"Bu böyük və ibrətamiz günlərdə biz İranın düşmənlərinə, ilk növbədə ABŞ, İsrail və onların həm regional, həm də regiondankənar müttəfiqlərinə xəbərdarlıq edirik ki, hər cür yanlış hərəkətlərdən çəkinsinlər. Onlar unutmasınlar ki, əziz vətənimizə qarşı istənilən təhdid və ya təcavüz silahlı qüvvələrin sıralarında xidmət edən İran xalqının övladları tərəfindən çox sərt şəkildə cavablandırılacaq".
Xatırladaq ki, fevralın 28-də ABŞ və İsrail İrana qarşı hərbi əməliyyatlara başlayıb. İslam Respublikasının ən böyük şəhərləri, o cümlədən paytaxt Tehran zərbələrə məruz qalıb. Ağ Ev bu hücumu İrandan gələn raket və nüvə təhlükələri ilə əsaslandırıb. Endirilən zərbələr nəticəsində Əli Xamenei və ölkə rəhbərliyinin digər əsas simaları həlak olublar.
Xamenei ilə vida mərasimi iyulun 3-də Tehranda başlayacaq. Cümə günü keçiriləcək hüzn tədbirində ən azı 100 ölkədən gəlmiş yüksəksəviyyəli nümayəndə heyətləri iştirak edəcəklər. İyulun 4-dən 5-dək Ayətullahın nəşi Tehranın Müsəllasında (İran paytaxtındakı ən böyük dini-ictimai kompleks) saxlanılacaq və burada hər kəs onunla vidalaşa biləcək.
İyulun 6-da Tehranda əsas küçələr boyu matəm yürüşü baş tutacaq, bundan sonra cənazə ölkənin əsas dini mərkəzi olan Qum şəhərinə aparılacaq və iyulun 7-də orada matəm mərasimləri təşkil ediləcək. İyulun 8-də Əli Xameneinin nəşi qonşu İraqa göndəriləcək, burada Kərbəla və Nəcəfdə yerli müsəlmanlar üçün ayrıca vida mərasimləri keçiriləcək. Dəfn mərasimi isə iyulun 9-da İranda, onun doğulduğu Məşhəd şəhərində baş tutacaq.
